نيۋ-يوركتە تۇركىتىلدەس دياسپورا وكىلدەرى باس قوستى
بۇل تۋرالى قازاقپارات «وتانداستار قورىنا» سىلتەمە جاساپ حابارلايدى.
اتاپ ايتقاندا، شاراعا تۇركى كەڭەسى باس حاتشىسىنىڭ ورىنباسارى گ. گوزالوۆ، «وتانداستار قورى» كەاق ءبىرىنشى ۆيتسە- پرەزيدەنتى ت. ادۋوۆ، ازەربايجان رەسپۋبليكاسىنىڭ دياسپورامەن جۇمىس جونىندەگى مەملەكەتتىك كوميتەت ءتوراعاسىنىڭ ءبىرىنشى ورىنباسارى ۆ. گادجيەۆ، قىرعىز رەسپۋبليكاسىنىڭ مەملەكەتتىك كوشى-قون قىزمەتىنىڭ ءتوراعاسى ب. يبراگيمجانوۆ، قازاقستان رەسپۋبليكاسىنىڭ باس كونسۋلى ج. ابدراشوۆ، تۇركيا رەسپۋبليكاسىنىڭ باس كونسۋلى ا. اقتاش جانە دياسپورانىڭ ورتالىق مەكەمەلەرىنىڭ باسقا دا لاۋازىمدى تۇلعالارى مەن ا ق ش- تا تۇراتىن تۇركى كەڭەسىنە مۇشە مەملەكەتتەر دياسپورالارىنىڭ وكىلدەرى قاتىستى.
جۇزدەسۋدە گ. گوزالوۆ قاتىسۋشىلارعا تۇرىك كەڭەسىنە مۇشە مەملەكەتتەر اراسىنداعى دياسپورالاردىڭ ىنتىماقتاستىعى تۋرالى حاباردار ەتىپ، 2019-2020 -جىلدارى ىسكە اسىرىلۋى ءتيىس شارالار جايىندا ەسەپ بەردى. سونىمەن قاتار تۇركى كەڭەسىنە مۇشە مەملەكەتتەر دياسپوراسى ورتالىق مەكەمەلەرىنىڭ لاۋازىمدى تۇلعالارى شەتەلدە تۇراتىن ءوز دياسپورالارىمەن جۇمىس تۋرالى بايانداما جاسالدى. ال ا ق ش-تا تۇراتىن تۇركى كەڭەسىنە مۇشە مەملەكەتتەر دياسپورالارى وكىلدەرى ءوز قىزمەتى تۋرالى اڭگىمەلەپ، تۇراقتى ىنتىماقتاستىقتى نىعايتۋ جانە ءوزارا ۇيلەستىرۋ جولدارىن تالقىلادى.
بۇدان بولەك، تاراپتار ۇيلەستىرىلگەن، كەشەندى جانە تۇراقتى ءىس-قيمىلداردى قامتاماسىز ەتۋ ماقساتىندا ولاردىڭ ورتالىق دياسپورا مەكەمەلەرى مەن دياسپورالار وكىلدەرى اراسىنداعى ىنتىماقتاستىقتى جالعاستىرۋعا كەلىستى. سونداي-اق، تۇركى كەڭەسىنە مۇشە مەملەكەتتەر دياسپوراسىنىڭ ورتالىق مەكەمەلەرى تۇركىتىلدەس دياسپورا جاستارى ءۇشىن بىرلەسكەن مادەني، ءبىلىم بەرۋ جانە سپورتتىق ءىس-شارالار ۇيىمداستىرۋعا ۋاعدالاستى.
دوڭگەلەك ۇستەلگە قاتىسۋشىلار ايگىلى ازەربايجان اقىنى جانە تۇركى ميستيكالىق اقىندارىنىڭ ءبىرى يمادەدين ناسيميدىڭ 650 جىلدىعىنا ارنالعان ميللس تەاترىنداعى كونتسەرتتى تاماشالادى.
اۆتور: قانات مامەتقازى ۇلى
