تۇركيانىڭ سيرياعا قاتىستى جاڭا اسكەري وپەراتسياسىنا ا ق ش ارالاسپايدى
انكارا سيريانىڭ سولتۇستىگىندە قاۋىپسىزدىك ايماعىن قۇرىپ، وندا بوسقىنداردى كوشىرمەكشى، دەپ حابارلايدى «حابار 24».
ەۆفرات وزەنىنىڭ شىعىسى، ياعني سيريانىڭ سولتۇستىگى كۇرد جاساقتارىنىڭ قولىندا. بۇل توپتى ا ق ش قولداسا، تۇركيا ولاردى دا تەرروريستەردىڭ قاتارىنا جاتقىزادى. دەمەك، ۆاشينگتون وسىنداي شەشىمگە كەلۋ ارقىلى تۇركيانى تاڭداپ وتىرعانىن اڭعارتقان سىڭايلى.
ا ق ش سيريانىڭ سولتۇستىگىندەگى تۇركيامەن شەكارالاس ايماقتاردان اسكەرىن اكەتىپ جاتىر. بۇل تۋرالى ءوڭىردى ا ق ش- تىڭ قولداۋىمەن باقىلاۋدا ۇستايتىن كۇرد جاساقتارى مالىمدەدى. ولاردىڭ ايتۋىنشا، ۆاشينگتون بۇل ارقىلى كۇرد جاساعىن تۇركيانىڭ الدىنا جىعىپ بەرگەن. سەبەبى، بۇعان دەيىن امەريكالىق اسكەريلەر كۇردتەرمەن ورتاق كەلىسىمگە كەلىپ، تەرروريستەرگە قارسى بىرىگىپ كۇرەسكەن ەدى. ال، رەسمي انكارا بۇل جاساقتى لاڭكەستىك توپ دەپ سانايدى. تۇركيا ەندى كوپ ۇزاماي وڭىرگە شابۋىل باستاۋعا بەكىنىپ وتىر. ناتيجەسىندە قاۋىپسىز ايماق قۇرىپ، 2 ميلليونداي سيريالىق بوسقىندى وسى جەرگە كوشىرمەك.
رەجەپ تايىپ ەردوعان، تۇركيا پرەزيدەنتى:
- كەشەگى ا ق ش پرەزيدەنتى دونالد ترامپپەن تەلەفون ارقىلى بولعان كەلىسىمنەن كەيىن امەريكالىق اسكەر شەكارادان شىعىپ جاتىر. ولار ءبىزدىڭ اسكەري وپەراتسياعا ارالاسپايدى. دەگەنمەن، ا ق ش پەن تۇركيا اراسىنداعى كەلىسسوزدەر جالعاسادى. كەلەسى ايدا ۆاشينگتونعا ىسساپارمەن بارامىز. ورتاق ماسەلەلەردى تالقىلايمىز. ال، سيريانىڭ سولتۇستىك- شىعىسىندا قاۋىپسىز ايماق قۇرۋعا قاتىستى وپەراتسيانى جاقىن كۇندەرى باستايمىز.
ەردوعان مالىمدەمەنى بۇگىن عانا جاساعانىمەن، ىسكە كەشە كىرىسىپ كەتكەن. تۇركيانىڭ اسكەرى مەن سوعىس تەحنيكالارى قازىر شەكارادا، وپەراتسياعا كىرىسۋگە بۇيرىقتى كۇتىپ، ساقاداي- ساي وتىر. بۇل ورايدا انكارانىڭ قولداۋىنا يە سيريانىڭ وپپوزيتسيالىق كۇشتەرى اسكەري وپەراتسيانى قولدايتىندىعىن ءبىلدىردى.
ساليم يدريس، سيريا وپپوزيتسياسىنىڭ تۇركياداعى رەسمي وكىلى:
- بۇل سيريالىقتاردىڭ جەرى. سوندىقتان ول جەردە قاۋىپسىز ايماق قۇرىپ، قايتارىپ بەرۋ - پارىزىمىز. تۇركيالىق اسكەريلەردى، ولاردىڭ باستاماسىن ءبىراۋىزدان قولدايمىز. ءوڭىردى لاڭكەستەردەن ازات ەتۋىمىز كەرەك.
جالپى بۇل اسكەري وپەراتسيانىڭ ماقساتىن رەجەپ تايىپ ەردوعان بىلاي ءتۇسىندىردى. ونىڭ ايتۋىنشا، سيريامەن شەكارالاس اۋماقتارداعى تۇركيانىڭ جەرىنە قاۋىپ تونبەۋى كەرەك. وندا لاڭكەستەردىڭ قاپتاۋى اۋماقتىق تۇتاستىققا زيان كەلتىرەدى. رەسمي انكارانىڭ مالىمدەۋىنشە، لاڭكەستەردىڭ قاتارىندا ا ق ش قولدايتىن كۇرد جاساقتارى دا بار.
ميەۆليۋت چاۆۋشوگلۋ، تۇركيا سىرتقى ىستەر ءمينيسترى:
- سيريادا داعدارىس باستالعالى بەرى اۋماقتىق تۇتاستىققا ءمان بەرىپ كەلدىك. ەندىگى شەكاراداعى جانە وعان جاقىن وڭىرلەردەگى لاڭكەستەردى تولىق جويۋىمىز كەرەك. سەبەبى ءبىزدىڭ ەلگە ەشقانداي زيان كەلمەۋى ءتيىس. وپەراتسيادان كەيىن بوسقىندارعا دا ورىن تابامىز، سيرياداعى تۇراقتىلىققا دا ءوز ۇلەسىمىزدى قوسامىز.
وسىلايشا، تاياۋ شىعىستاعى جاعداي ۋشىعا ءتۇستى. ا ق ش وپەراتسياعا ارالاسپايمىز دەپ ات تونىن الا قاشتى. قولداۋسىز قالعان كۇرد جاساقتارى پەنتاگونعا ىزالى. «دەگەنمەن، انكارامەن سوڭىنا دەيىن كۇرەسەمىز»، دەيدى.
ال تۇركيا انە- مىنە، سيريانىڭ سولتۇستىگىندەگى جورىققا دايىن. ال، جەرى تالان- تاراجعا تۇسكەن رەسمي داماسك «جاتجۇرتتىق اسكەريلەر تۇگەلدەي سيريا جەرىنەن كەتسىن» دەگەندى ايتادى.
ۆاليد مۋاللەم، سيريا سىرتقى ىستەر ءمينيسترى:
- ا ق ش تا، تۇركيا دا سيريانىڭ سولتۇستىگىنە اسكەريلەرىن زاڭسىز كىرگىزدى. ودان بولەك، ءوزارا كەلىسىمگە كەلىپ، ءبىزدىڭ جەردە قاۋىپسىز ايماق قۇرۋ- قۇرماۋ شەشىمىن قابىلدايدى. بۇل حالىقارالىق قۇقىقتى بۇزۋ! ب ۇ ۇ- نىڭ زاڭدارىنا قايشى! سيريا ۇكمەتىنىڭ رۇقساتىنسىز قالاي عانا سيريانىڭ جەرىن بولىسكە سالۋعا بولادى. شەتەلدىك اسكەريلەر دەرەۋ ەل اۋماعىنان شىعارىلسىن!
ب ۇ ۇ مىنبەرىنەن ايتىلعان بۇل مالىمدەمە ەلەۋسىز قالدى. اق ءۇي «وپەراتسياعا ارالاسپايمىز» دەپ ۋادەسىن بەردى. ودان بولەك، بۇگىنگى كۇنگە دەيىن ۇستالعان لاڭكەستەر دە تۇركيانىڭ جاۋاپكەرشىلىگىنە وتەتىنىن ايتتى. سەبەبى، فرانسيا، گەرمانيا سىندى مەملەكەتتەر سودىرلىق جولدى تاڭداعان ءوز ازاماتتارىن كەرى قابىلداۋدان باس تارتقان. ساراپشىلاردىڭ ايتۋىنشا، تۇركيا ناتو- عا مۇشە. سوندىقتان ا ق ش- قا كۇرد جاساقتارىنان گورى تۇركيامەن سەرىكتەستىك ءتيىمدى بولىپ تۇرعانى عوي.
