مينيستر ەلىمىزدە اۋە بيلەتتەرىنىڭ باعاسىن تومەندەتۋ جولدارىن اتادى

نۇر-سۇلتان. قازاقپارات - يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ قازاقستاندا اۋە بيلەتتەرىنىڭ باعاسى قالاي تومەندەتىلەتىنىن ايتتى، دەپ حابارلايدى قازاقپارات ءتىلشىسى.

«مەملەكەت باسشىسى ءوز جولداۋىندا كەيبىر اۋە كومپانيالاردىڭ بيلەت قۇنى قىمبات ەكەنىن اتاپ وتكەن بولاتىن. سوندىقتان مينيسترلىك وسى باعىتتا جۇيەلى جۇمىستاردى جۇرگىزىپ وتىر. اۋە بيلەت قۇنى ءبىرىنشى كەزەكتە اۋە تاسىمالدارىنا باعا بەلگىلەۋدىڭ (باسەكەلەستىك، سۇرانىس، ماۋسىمدىق، مەرەكە جانە دەمالىس كۇندەرى) نارىقتىق جانە ديناميكالىق مەحانيزمىنە، اۆياوتىن جانە جولاۋشىلار اعىنىنىڭ دەڭگەيىنە بايلانىستى. مەملەكەت باعانى تىكەلەي رەتتەمەيدى، تەك اۆياكومپانيالار ءۇشىن باسەكەگە قابىلەتتى جاعدايلاردى جاسايدى. باسەكەنىڭ ارقاسىندا عانا ءبىز اۆيابيلەت قۇنىن تومەندەتەمىز»، - دەدى بەيبىت اتامقۇلوۆ ۇكىمەت وتىرىسىندا.

ءمينيستردىڭ ايتۋىنشا، مەملەكەتتىڭ ءوز نارىعىن باقىلاپ، ءتيىستى قاداعالاۋدى جۇزەگە اسىرۋى ءتيىس. سوندىقتان مينيسترلىك كەشەندى شارالاردى قابىلداپ جاتىر.

«بىرىنشىدەن، 2012 -جىلدان باستاپ ىشكى باعىتتار بويىنشا قازاقستاندىق اۋە اكومپانيالاردىڭ تۇراقتى جولاۋشىلار رەيستەرىن ورىنداۋىنا بارلىق شەكتەۋلەر الىپ تاستالدى. ەڭ تانىمال ءۇش مارشرۋتتا 4 اۋە تاسىمالداۋشىسى ءار ءتۇرلى تاريفتىك ۇسىنىستارمەن ۇشۋدى ورىندايدى. بۇل شارا اۆيابيلەتتەر قۇنىن تومەندەتۋگە ىقپال ەتتى. مىسالى، ەگەر 2012 -جىلى نۇر-سۇلتان- الماتى باعىتى بويىنشا ورتاشا بيلەت قۇنى 85 دوللاردى قۇراسا، 2019 -جىلى بيلەت قۇنى - ورتاشا العاندا 50 دوللاردى قۇرادى. ەكىنشىدەن، مامىردا العاشقى ۇلتتىق لوۋكوستەر Fly Arystan ىسكە قوسىلدى. ونىڭ بيلەت قۇنى «ەير استانامەن» سالىستىرعاندا 2 ەسە تومەن. بۇگىنگى كۇنى 470 مىڭنان استام بيلەت ساتىلدى، %60 بيلەتتەردىڭ قۇنى 10 مىڭ تەڭگەدەن تومەن»، - دەدى ول.

اتامقۇلوۆتىڭ ايتۋىنشا، مينيسترلىك تىكەلەي وندىرۋشىدەن سوڭعى تۇتىنۋشىعا دەيىن اۆياوتىندى جەتكىزۋ تىزبەگىن وڭتايلاندىرادى.

«ۇلتتىق ەكونوميكا مينيسترلىگى مۇددەلى مەملەكەتتىك ورگاندارمەن بىرلەسىپ اۆياوتىن باعاسىن اشىق بەلگىلەۋ جانە ونى ۇزدىكسىز جەتكىزۋ بويىنشا تەڭ قولجەتىمدىلىكتى قامتاماسىز ەتۋ مەحانيزمدەرىن ازىرلەيدى. مۇناي وڭدەۋ زاۋىتتارىن جاڭعىرتۋ ارقىلى وسى جىلى وندىرىلەتىن اۆياوتىن كولەمى 694 مىڭ توننانى قۇرايدى. بۇل اۆياتسيالىق نارىق قاجەتتىلىگىن (700 مىڭ توننا) تولىعىمەن جابۋعا مۇمكىندىك بەرەدى»، - دەدى ول.

ەسكە سالا كەتسەك، بۇگىنگى ۇكىمەت وتىرىسىندا اسقار مامين قازاقستاندىق ازاماتتىق اۆياتسيا سالاسىن دامىتۋدا ءبىرقاتار تاپسىرما بەرگەن بولاتىن.

اۆتور: ايان بەكەن ۇلى