اقوردادا ۇلتتىق كەڭەس مۇشەلەرىنىڭ ەكونوميكالىق ماسەلەلەر بويىنشا ۇسىنىستارى قارالدى

نۇر- سۇلتان. قازاقپارات - بۇگىن اقوردادا ۇلتتىق قوعامدىق سەنىم كەڭەسى مۇشەلەرىنىڭ ەكونوميكالىق بلوگ بويىنشا ۇسىنىستارىن قاراستىرۋ بويىنشا جينالىس ءوتتى، دەپ حابارلايدى قازاقپارات.

«بۇگىن اقوردادا ۇلتتىق كەڭەستىڭ مۇشەلەرى ايتقان ۇسىنىستاردىڭ ەكونوميكالىق بلوگىن قاراستىرۋ بويىنشا جينالىس ءوتتى. وعان پرەزيدەنت اكىمشىلىگى باسشىسىنىڭ ورىنباسارى تيمۋر سۇلەيمەنوۆ جۇرگىزدى»، - دەپ جازدى ق ر پرەزيدەنتىنىڭ كەڭەسشىسى ەرلان قارين.

تالقىلاۋعا قارجى مينيسترلىگىنىڭ، ۇلتتىق ەكونوميكا مينيسترلىگىنىڭ، ەسەپ كوميتەتى مەن سالىق كوميتەتىنىڭ، سونىمەن قاتار «اتامەكەن» ۇ ك پ جانە پرەزيدەنت اكىمشىلىگىنىڭ الەۋمەتتىك- ەكونوميكالىق مونيتورينگ ءبولىمىنىڭ وكىلدەرى، سونداي- اق ۇلتتىق كەڭەستىڭ ەكونوميكالىق توبىنان مۇحتار تايجان، وراز جاندوسوۆ، ارمانجان بايتاسوۆ، قايىربەك ارىستانبەكوۆ، باعدات مۋسين جانە ازاماتحان امىرتايەۆ قاتىسقان.

«جينالىس بارىسىندا سالىق زاڭناماسى مەن بيۋدجەتتىك جۇيەنى جەتىلدىرۋ ماسەلەلەرى قارالدى. ونىڭ قورىتىندىسى بويىنشا مەملەكەتتىك ورگاندارعا كوپتەگەن سۇراقتار تۋدىراتىن ماسەلەلەردى پىسىقتاپ، پرەزيدەنت اكىمشىلىگىنە ۇسىنىستار ەنگىزۋ تاپسىرىلدى. كەلەسى جينالىس قازاننىڭ 11-دە ەكونوميكالىق بلوگتىڭ باسقا دا ۇسىنىستارىنا قاتىستى وتەدى»، - دەپ جازدى ە. قارين.

ەسكە سالساق، بيىلعى 17 - شىلدەدە مەملەكەت باسشىسى قاسىم- جومارت توقايەۆ ۇلتتىق قوعامدىق سەنىم كەڭەسىن قۇرۋ، ونىڭ ەرەجەسىن جانە قۇرامىن بەكىتۋ تۋرالى جارلىققا قول قويدى.

6 - قىركۇيەك كۇنى ۇلتتىق كەڭەستىڭ العاشقى وتىرىسى ءوتتى. وندا ق. توقايەۆ ەلىمىزدى دامىتۋعا جانە جاڭعىرتۋعا باعىتتالعان باستامالار مەن ۇسىنىستاردى پىسىقتاۋ ىسىندەگى ۇلتتىق كەڭەستىڭ ءرولىن اتادى.