قازاقستاندىق كاسىپقوي بوكسشىلاردىڭ جاڭا رەيتينگى جاريالاندى
جاڭا ءتىزىم بويىنشا، سۋپەراۋىر سالماقتا ونەر كورسەتەتىن قازاقستاندىق يۆان دىچكو ءبىر ساتى تومەن سىرعىپ، 14-ورىنعا ورنالاسقان. توپ-3 تريەۆور برايان (ا ق ش)، الەكساندر ۋسيك (ۋكراينا) جانە ەنتوني دجوشۋالاردان (ۇلى بريتانيا) قۇرالعان.
ەكىنشى ورتا سالماق ساناتىنداعى WBA International, WBO Global جانە WBC Asia Continental بەلدىكتەرىنىڭ يەسى ايدوس ەربوسىن ۇلى تورتىنشىدەن ءۇشىنشى ورىنعا كوتەرىلدى. ءبىرىنشى ورىندا — بريتانيالىق دجون رايدەر، ەكىنشى — رەسەيلىك بوكسشى فەدور چۋدينوۆ.
جارتىلاي ورتا سالماقتاعى WBA Inter- Continental بەلدىگىنىڭ يەگەرى نۇرسۇلتان جاڭابايەۆ بۇرىنعىشا جەتىنشى ساتىدا ورنالاسقان. وسى ساناتتىڭ باسىندا رەسەيلىك الەكساندر بەسپۋتين تۇر، ەكىنشى ورىن ونىڭ جەرلەسى رادجاب بۋتايەۆقا بۇيىرعان. ال كۋبالىق يوردەنيس ۋگاس ۇزدىك ۇشتىكتى تۇگەندەگەن.
