كونگرەسس ترامپتىڭ زاڭگەرىنەن ۋكراينا جايلى قۇجاتتاردى سۇرادى

ولار 15- قازانعا دەيىن «پرەزيدەنت پەن ونىڭ اكىمشىلىگى 2020-جىلى ا ق ش- تا وتەتىن پرەزيدەنت سايلاۋىنا ىقپال ەتۋ ماقساتىندا ۋكرايناعا قىسىم جاساۋعا تىرىسۋىنا قاتىسى بار بارلىق ماتەريالداردى»: حاتتاردى، تەلەفون اڭگىمەلەرىنىڭ جازبالارىن، س م س حابارلامالارىن بەرۋدى تالاپ ەتكەن.

كونگرەسمەندەر بۇل تالاپتى ۋكراينا وكىلدەرىنەن دەموكراتتار اتىنان پرەزيدەنت سايلاۋىنا ءتۇسۋى مۇمكىن دجو بايدەننىڭ ءىسىن تەكسەرۋدى سۇراعانى جايلى دجۋليانيدىڭ ءوز سوزىنە وراي قويعان.

دجۋلياني كەيىن بۇل سوزدەرىنەن اينىعانىمەن ۋكراينا بيلىگى وكىلدەرىمەن كەزدەسكەنىن، ولارمەن ۋكراينانىڭ 2016-جىلعى سايلاۋعا ترامپ قارسىلاسى جاعىندا ارالاسقانى جايلى سويلەسكەنىن بىرنەشە رەت راستاعان.

كونگرەستى دجۋلياني بۇل ارەكەتىن ترامپ اكىمشىلىگىنىڭ وكىلدەرىمەن كەلىسىپ جاسادى ما، جوق پا دەگەن ماسەلە قىزىقتىرادى.

دجۋلياني 2016-جىلعى سايلاۋ كەزىندە ۋكراينانىڭ ءبىرقاتار جوعارى لاۋازىمدى تۇلعالارىنىڭ ترامپقا قارسى «ويناعانىن» جانە ۋكراينانىڭ بۇرىنعى باس پروكۋرورى ۆيكتور شوكين بايدەن قىسىمىمەن قىزمەتىنەن بوساتىلعانىن دالەلدەيتىن دالەلدەرى بار ەكەنىن راستاعان.

«پرەزيدەنت پەن ونىڭ اينالاسى بايدەندى اشكەرەلەيتىن ماتەريال الۋ ءۇشىن ۋكراينا بيلىگىنە قىسىم جاساعانى» جايلى ا ق ش ارنايى قىزمەتى وكىلىنىڭ حابارىنان كەيىن دەموكراتتار باقىلاۋىنداعى وكىلدەر پالاتاسى زەرتتەۋ باستاعان. زەرتتەۋ ناتيجەسى بويىنشا ترامپقا يمپيچمەنت جاريالانۋى مۇمكىن.

ترامپ پەن ۋكراينا پرەزيدەنتى ۆلاديمير زەلەنسكيدىڭ جاريا بولعان تەلەفون اڭگىمەسىنىڭ مازمۇنىنا قاراعاندا ا ق ش پرەزيدەنتى ۋكراينا پرەزيدەنتىنەن بايدەننىڭ ۇلىنىڭ ۋكرايناداعى ءىسىن تەكسەرۋدى سۇراعان.

ترامپ كونگرەستىڭ زەرتتەۋىن «جوق جەردەن داۋ ىزدەۋ» دەپ سانايدى. ول اكەلى-بالالى بايدەندەردى جەمقورلىققا قاتىسى بار دەپ ايىپتايدى، زەلەنسكيگە قىسىم جاساماعانىن ايتادى.

«ازاتتىق»