جۇزدەن اسا اسكەري قىزمەتشى العاش رەت پاراشيۋتپەن سەكىردى

ولاردىڭ بارلىعى پاراشيۋتپەن سەكىرۋ، جاۋىنگەرلىك دايىندىق باعدارلاماسىنىڭ اينىماس بولىگى بولىپ تابىلاتىن دەسانتتىق- شابۋىلداۋشى اسكەردە قىزمەت اتقارۋدا.

ءبىر اي كولەمىندە ءبىرىنشى دەسانتتىق- شابۋىلداۋشى باتالونىنىڭ مەرزىمدى قىزمەتتەگى اسكەري قىزمەتشىلەرى ارنايى كەشەندە باستاپقى اۋە- دەسانتتىق دايىندىقتان ءوتتى. ولار پاراشيۋت جۇيەسىنىڭ قۇرىلىمىن، ونىڭ تاكتيكالىق- تەحنيكالىق سيپاتتامالارىن، نەگىزگى جانە قوسىمشا ءپاراشيۋتتى سالۋدىڭ رەتىن، سونداي- اق جەرۇستى سەكىرۋ ەلەمەنتتەرىن پىسىقتاۋدى ورىندادى.

اۋە- دەسانتتىق دايىندىق بويىنشا ءبىرىنشى دەسانتتىق- شابۋىلداۋشى باتالونى كومانديرىنىڭ ورىنباسارى مايور دانيار سىزدىقوۆ اتاپ وتكەندەي، سەكىرۋ الدىندا ءاربىر اسكەري قىزمەتشىنىڭ مورالدى- پسيحولوگيالىق جاعدايى تەكسەرىلدى. سەبەبى سەكىرۋگە رۇقسات الۋ ءۇشىن، پسيحولوگيالىق دايىندىقتان ءوتۋ ەڭ ماڭىزدى شارت بولىپ تابىلادى.

قاتارداعى مەرزىمدى قىزمەتكەر جاقسىلىق ماككەمادەن - بۇل كۇنى ناعىز اسكەري دەسانتشىعا ءتان العاشقى پاراشيۋتپەن سەكىرۋىن ورىندادى.

«بۇل ەرەكشە سەزىم، اسپانمەن استاسقانداي اسەردە قالاسىڭ. تىكۇشاق بورتىندا قورقىنىش قۋانىشقا ۇلاستى. مەن اسپانعا كوتەرىلدىم. بويىمدى ادرەنالين شارپىپ، جان- دۇنيەڭدى دە الىپ ۇشقانداي بولادى. پاراشيۋت اشىلدى. ەندى مىنە، مەن ناعىز دەسانتشى اتاندىم» - دەپ بىردەن جەرگە تۇسكەننەن كەيىنگى سەزىمدەرىمەن ءبولىستى.

دايىندىق جوسپارىنا سايكەس دەسانتتىق- شابۋىلداۋشى اسكەردىڭ مەرزىمدى قىزمەتتەگى اسكەري قىزمەتشىلەردىڭ جاس تولىمدارى كەم دەگەندە ەكى رەت پاراشيۋتتەن سەكىرۋدى ورىندايدى. ءبىرىنشىسىن جۇزەگە اسىرعانىمەن، ەندىگى كەزەكتە دەسانتتى دايىنداۋداعى ماڭىزدى بولىگى بولىپ تابىلاتىن قارۋمەن سەكىرۋدى ورىنداۋعا تۋرا كەلەدى.