الماتى وبلىسىندا تۇڭعىش رەت اربا جارىسى ءوتتى

تالدىقورعان. قازاقپارات - الماتى وبلىسىندا تۇڭعىش رەت «اربا بايگەسى» جارىسى ءوتتى. 

قازاقستاندا ءبىلىم الىپ جاتقان شەتەلدىك ستۋدەنتتەر 9 كۇن بويى ىلە الاتاۋىنىڭ باۋرايىندا، كەگەن اۋدانىنداعى قارقارا جايلاۋىندا كوشپەندىلەردىڭ تۇرمىس سالتىمەن تانىستى، دەپ حابارلايدى قازاقپارات ءتىلشىسى.

تارتىستى بايگەگە قازاقستان، ءۇندىستان، قىتاي، وزبەكستان كوماندالارى قاتىستى. ءار كوماندادا 10 مۇشە بولدى. ولارعا قويىلعان تالاپ وڭاي بولمادى. بارلىق كوماندالار جازىق دالادا اربامەن جارىستى، ءتۇرلى قيىندىقتارعا تاپ بولدى. بىرەۋلەرىنىڭ ارباسى سىندى. سونداي-اق جارىستاعى قيىن تالاپتىڭ ءبىرى ول - نىسانا كوزدەۋ. اربانى سۇيرەتىپ كەلە جاتقان ارباكەش جانە اربانىڭ ۇستىندەگى كوماندا مۇشەسى ساداقپەن نىساناعا اتۋى ءتيىس. ەگەر جەبە نىساناعا ءدوپ تۇسپەسە كوماندا مۇشەسىنە جۇگىرۋگە تۋرا كەلەدى.

ال مۇنداعى اربالاردىڭ ديزاينى دا ەرەكشە. جارىستى ۇيىمداستىرۋشىلاردىڭ ءبىرى داۋرەن ۋالييەۆ ايتۋىنشا، بۇل اربالاردىڭ بارلىعى وسى جارىس ءۇشىن ارنايى جاسالعان.

«مىنا كورىپ تۇرعان اربا بۇل 4 مىڭ جىلدىق تاريحى بار مىنا پەتروگليفتىڭ كوشىرمەسى. 4 مىڭ جىل بۇرىن ءبىزدىڭ اتا- بابالارىمىز وسىنداي كولىك ءتۇرىن ويلاپ تاپقان. بۇل اربانىڭ دوڭگەلەگىن ءبىر قولمەن قوزعالتۋعا بولادى. جەڭىل قوزعالادى. 12 اربانى دايىنداۋ ءۇشىن ءبىر اي ۋاقىت كەتتى»، دەدى داۋرەن ۋاليەۆ.

ۇيىمداستىرۋشىلار جارىس باستالماس بۇرىن بارلىق قاتىسۋشىلاردى الدىن-الا دايىنداعاندارىن ايتادى. سەبەبى، ساداق اتۋ كەز- كەلگەن جاننىڭ قولىنان كەلە بەرمەيدى. ال شەتەلدىك ستۋدەنتتەر جارىسپەن قاتار، جايلاۋداعى ءومىر دە ولاردى قاتتى قىزىقتىرعانىن ايتتى.

«9 كۇن بويى جايلاۋدا ءومىر ءسۇرۋ بىزگە وتە قىزىق بولدى. قازاقتىڭ ۇلتتىق تاعامدارى، قىمىز سۋسىنىڭ ءدامى ءتىل ۇيىرەدى. ءبىز قازاق ءۇيىنىڭ دە قالاي قۇرىلاتىنىن دا كوردىك. ءبىز 9 كۇن بويى ءومىر سۇرگەن قارقارا جايلاۋى تەڭىز دەڭگەيىنەن 2200 مەتر بيىكتە ورنلاسقان ەكەن. تۇندە وتە سۋىق بولادى. ءبىراق تازا اۋادا، تاۋدىڭ ەتەگىندە تىنىعۋ بىزگە كەرەمەت دەمالىس سىيلادى. ءۇندى ەلىنىڭ ازاماتى رەتىندە «اربا بايگە» جارىسى جىلدا ۇيىمداستىرىلسا ەكەن دەپ تىلەگىمدى بىلدىرگىم كەلەدى. ءبىز قازاق حالقىنىڭ سالت-داستۇرىمەن، تاريحىمەن تانىسىپ، رۋحاني جان- دۇنيەمىزدى بايىتتىق. تاعى ءبىر ايتايىن دەگەن دۇنيە جايلاۋدا تەلەفون، ينتەرنەت ۇستامايدى. سوندىقتان ميىمىزدا تىنىعىپ، جاستار ءبىر-بىرىمىزبەن سويلەسىپ، تانىسىپ، قازىر دوس بولىپ جاتىرمىز»، - دەدى قازاقستان- رەسەي مەديتسينا ۋنيۆەرسيتەتىنىڭ ستۋدەنتى، ءۇندىستان كومانداسىنىڭ مۇشەسى امەرديپ دۋدي.

الماتى وبلىسىندا تۇڭعىش رەت ۇيىمداستىرىلعان «اربا بايگەسى» جارىسىندا بارلىق كوماندالار باس جۇلدەنى يەلەنۋ ءۇشىن بارىن سالدى.

اربا بايگەسىندە بارلىق كەدەرگىلەردەن قازاقستان كومانداسى مۇدىرمەي ءوتىپ، باس جۇلدەنى جەڭىپ الدى. جارىستا ءۇندىستان مەن وزبەكستان كوماندالارى دا جاقسى ناتيجە كورسەتتى.

«نامىسىمىزعا تىرىسىپ، كۋبوگىمىزدى ءوزىمىز العىمىز كەلەدى. بارلىعىمىز بىرىگىپ، وسى كۋبوكتى ۇتىپ الدىق. اتا-بابامىزدىڭ رۋحىن وسى جارىستا بۇتكىل الەمگە تانىتىپ، ءبىزدىڭ اتالارىمىزدىڭ مىقتىلىعىن كورسەتۋگە ۇلەس قوسقانىمىزعا وتە قۋانىشتىمىز»، - دەدى قازاقستان كومانداسىنىڭ مۇشەسى ءتالىپ باتىرجان.

ال شارانى ۇيىمداستىرعان الماتى وبلىسىنىڭ ىشكى ساياسات باسقارماسى «اربا بايگەسى» جارىسىن ەلىمىزدىڭ برەندىنە اينالدىرۋدى جوسپارلاپ وتىر.

«بىزدەگى باستى ماقسات - ستۋدەنتتەر اراسىندا، جاستار اراسىندا اسىرەسە سولاردىڭ اراسىندا ءبىز ناسيحاتتاپ جۇرگەن «رۋحاني جاڭعىرۋ» باعدارلاماسى حالىقارالىق دوستىقتىڭ نىعايۋىنا اسەرىن تيگىزەدى دەگەن ويدامىز»، - دەدى وبلىستىق ىشكى ساياسات باسقارماسىنىڭ باسشىسى رۋستام ءالي.

اۆتور: سامال قابىشەۆا