يت تۋرالى ەڭ قىزىقتى فاكتىلەر
يتتەر ورتا ەسەپپەن 100-200 ءسوزدى تۇسىنەدى جانە ءوزىنىڭ ءىس ارەكەتىمەن بايلانىستىرا الادى. بۇل 2-3 جاسار بالانىڭ سوزدىك قورىمەن تەڭ. يت ءۇشىن داۋىس ىرعاعى دا ماڭىزدى. مىسالى اسىراندى ءيتىڭىزدى ماقتاپ، قۇپتاپ ايتاتىن ءسوزىڭىزدى قاراپايىم جاي داۋىسپەن ايتساڭىز، ول ويىنداعى جاعىمدى سوزدەرمەن بايلانىستىرىپ قۋانادى، ال ەگەر داۋسىڭىزدى كوتەرىپ، جوعارى كوڭىل كۇيمەن ايتساڭىز، ودان سايىن شاتتانىپ كەتەدى. يت بەينەلەر مەن وقيعالاردى ەسىندە ساقتاپ قالادى، ءبىراق ۋاقىت وتە كەلە ميىندا اقپارات كوبەيگەن سايىن كەيبىرىن ۇمىتىپ قالادى.
عىلىمي زەرتتەۋلەر ناتيجەسىنە سۇيەنسەك، يتتەردىڭ 20 پايىزى تاماق بەرگەنگە قاراعاندا، يەسىنەن ماقتاۋ ءسوز ەستىگەنىنە كوبىرەك قۋانادى ەكەن. بۇل ءيتتىڭ قوجايىنىنا دەگەن ادالدىعىن كورسەتەدى جانە «يت تويعان جەرىنە» دەگەن ءسوزدى جوققا شىعارادى. قۇلاعى ەستىمەيتىن ادامدارمەن تۇراتىن يت ەشقانداي دىبىسسىز- اق، قولدىڭ كورسەتۋىمەن، ىممەن ايتىلعانداردى جاقسى تۇسىنەدى. بارلىق يت ءوز يەسىنىڭ ءتۇرىن تانيدى، ولار كۇلكىسى مەن اشۋىنان اجىراتادى.
يتتەر دە كۇلگەن ادامدى جاقسى كورەدى، اشۋلى ادامدى ۇناتپايدى. بالا كەزىمىزدە ەستىگەن يتتەن قورقىپ، قاشساڭ، ول دا سەنى قۋادى دەگەن ءسوز وسىعان دالەل.
يتتەر تەلەديداردان ءتىرى جانۋاردى كورسەتىپ جاتسا، ونى تانيدى. ءتىپتى تەلەديداردان ەستىلگەن ءيتتىڭ داۋىسىن دا جازباي اجىراتادى. ال تەلەديدارداعى كادرلاردىڭ اۋىسۋىن ادامنان دا تەز كورەدى، سەبەبى ولار ءۇشىن كينونىڭ ستاندارتتى جىلدامدىعى باياۋ كورىنەدى.
يتتەر ادامداردىڭ ءبىر- بىرىنە دەگەن قارىم- قاتىناسىنا، تارتىبىنە قاراپ، ءوزى دە ول ادامعا دەگەن اراقاتىناسىن انىقتاپ الادى. مىسالى ءوز يەسىن رەنجىتكەن ادامعا ول دا قىرىن قارايدى، كەم دەگەندە بەرگەن تاماعىن جەمەي قويۋى مۇمكىن.
ادام قايدا قاراسا، يت تە سول جاققا قارايدى، ءتىپتى اشىق الاڭقايعا قاراپ وتىرسا دا. قاراپ وتىرساق، يتتەردىڭ ەستە ساقتاۋ قابىلەتى، سوزدەردىڭ ماعىناسى مەن ىرعاعىن ءتۇسىنۋى، تەلەديدارعا رەاكسياسى - ءبارى- ءبارى ادامنىڭ قاسيەتتەرىنە ۇقسايدى. بالكىم بۇل ادام مەن ءيتتىڭ 30 مىڭ جىلدىق دوستىعىنىڭ ناتيجەسى شىعار.
Massaget.kz
