ەلجان ءبىرتانوۆ الماتىدا باسى داۋعا قالعان دارىگەرلەرگە قاتىستى پىكىر ءبىلدىردى

«الماتىلىق دارىگەرلەرگە قاتىستى ايتار بولسام، ناۋقاستىڭ جاعدايى قيىنداپ، ارتى قايعىلى جاعدايمەن اياقتالسا - بۇل جاعدايدى زاڭنامالىق كونتەكستە عانا قاراۋ كەرەك. دەمەك، ءتيىستى مەحانيزم بار. بۇل جاعدايدا (ءوزىنىڭ كاسىبي مىندەتىن ءتيىستى دەڭگەيدە ورىنداماۋ بابى بويىنشا) قىلمىستىق ءىس قوزعالدى. تەرگەۋ جۇمىستارى زاڭ تالاپتارىنا ساي جۇرگىزىلۋى كەرەك. مەملەكەت باسشىسىنىڭ تاپسىرماسى بار. ءبىز جانە باسقا دا مەملەكەتتىك ورگاندار بۇل جاعدايدى باقىلاۋدا ۇستاپ وتىرمىز. ياعني، تولىققاندى ساراپتاما جۇرگىزىلۋى كەرەك. دارىگەرلەردىڭ قاتەلىگى نەمەسە جۇمىسىندا كەمشىلىگى بولدى ما؟ ەگەر قاتەلىك بولسا، سول قاتەلىك ناۋقاستىڭ ولىمىنە اكەپ سوقتى ما؟ ءبىراق، تەرگەۋ جۇرگىزۋ دەنساۋلىق ساقتاۋ مينيسترلىگىنىڭ قۇزىرەتىندە ەمەس»، - دەدى ەلجان ءبىرتانوۆ ۇكىمەتتىڭ باسپا ءسوز ورتالىعىندا.

مينيستر مەديتسينالىق قىزمەتكەرلەر تاراپىنان تۇسىنبەۋشىلىك بارىن ايتادى.

«باس بوستاندىعىنان ايىرۋ سەكىلدى بۇلتارتپاۋدىڭ اۋىر ءتۇرىن قولدانۋ قاجەت ەمەس دەپ ەسەپتەيمىن. جەتكىلىكتى دارەجەدە بىلىكتى بولعاننان كەيىن دارىگەرلەر ارى قاراي جۇمىس ىستەۋى ءتيىس. سول سەبەپتى مەملەكەت باسشىسىنىڭ بۇل جاعدايعا نازار اۋدارعانىنا قۋانىپ وتىرمىز. بۇل جاعدايعا قاتىستى پوزيتسيام وسى. ەموتسياسىز، زاڭنامالىق تالاپ بويىنشا تەرگەۋ جۇرگىزۋ كەرەك. شەشىمدى سوت قابىلدايدى»، - دەدى ەلجان ءبىرتانوۆ.

ەسكە سالا كەتسەك، بۇعان دەيىن الماتى قالاسى مامانداندىرىلعان اۋدانارالىق تەرگەۋ سوتىنىڭ قاۋلىسىنا سايكەس، اسقار تۇڭعىشبايەۆ (الماتى قالاسى №4 قالالىق كلينيكالىق اۋرۋحاناسىنىڭ انەستەزيولوگى) پەن قانات تەزەكبايەۆ (الماتى قالاسى №4 مەملەكەتتىك كلينيكالىق اۋرۋحاناسىنىڭ باس دارىگەرى) ەكى اي مەرزىمگە قامالعان بولاتىن. ولار ق ر ق ك 317-بابى 3-بولىمىندە قاراستىرىلعان قىلمىستى جاسادى دەپ كۇدىككە ءىلىنىپ وتىر.

قازاقستان پرەزيدەنتى قاسىم- جومارت توقايەۆ گەرمانيا اۋرۋحاناسىندا جاسالعان وتادان سوڭ قايتىس بولعان ناۋقاستىڭ ءولىمىن زاڭعا سايكەس تەكسەرۋدى تاپسىردى. سول كۇنى الماتى قالاسى №4 اۋرۋحاناسىنىڭ باس دارىگەرى قانات تەزەكبايەۆ ەشقايدا كەتپەۋ تۋرالى قولحاتپەن بوساتىلعان ەدى.

اۆتور: ايان بەكەن ۇلى