ميتينگكە شىققان ايەلدەرگە پاتەر بەرسەك، كۇنى ەرتەڭ ءبارى كوشەگە شىعادى - مينيستر

«اتاۋلى الەۋمەتتىك كومەك (ا ا ك) الۋ ىسىندە الاياقتىق جاعدايى شىنىندا دا، كوبەيىپ بارادى. ا ا ك تاعايىندالاتىنى حابارلانا سالا سوتتاردى ايىرىلىسۋ تۋرالى ارىزدار «كومىپ تاستادى». وتكەن اپتادا ب ا ق- تان ءبىر وتباسى ءوز بالاسىن بالالار ۇيىنەن الىپ كەتكەنى تۋرالى، ال ا ا ك- ءتى رەسىمدەپ العاننان كەيىن بالانى قايتا وتكىزىپ جىبەرگەنى تۋرالى جاڭالىق وقىدىم. ورالدا ءتىپتى كەيبىر ادامداردىڭ ۋاقىتشا قارتتار ۇيىنەن قارتايعان اكە-شەشەسىن ۇيىنە الىپ كەلگەنىن ەستىدىم. 8 ميلليون تەڭگە جىلدىق كىرىسى بار كەيبىرەۋلەر ناقتى تابىسىن جاسىرعان. سول سەبەپتى، ۇكىمەتتى بۇل جاعداي كادىمگىدەي الاڭداتىپ تاستادى. البەتتە، الاياقتىقتىڭ جولىن كەسىپ، ول دەرتپەن كۇرەسۋ كەرەك»، - دەدى داۋرەن ابايەۆ «حابار» ارناسىنداعى «اشىق ديالوگ» باعدارلاماسىندا.

داۋرەن ابايەۆ سونىمەن بىرگە سوڭعى ۋاقىتتا قايتالانعان كوپبالالى انالاردىڭ ميتينگىنە قاتىستى پىكىرىن ءبىلدىردى.

«الاڭعا شىققان ايەلدەر كەزەكتەن تىس پاتەر بەرۋدى تالاپ ەتىپ وتىر. ال بۇل تالاپ مەملەكەتتىك كومەكتى ادىلەتتى تۇردە تاراتۋ قاعيداتىن بۇزادى. وسى اكسيالاردان كەيىن ول ايەلدەردىڭ كوبىنىڭ ەڭبەككە جارامدى كۇيەۋلەرى بارى انىقتالدى. سونداي-اق، كەيبىر اكسياعا قاتىسۋشىلاردىڭ ءۇيى بارى دا بەلگىلى بولدى. ولاردىڭ كوبىنىڭ نەسيەسى تولەنىپ، اتاۋلى الەۋمەتتىك كومەك، دەمەۋشىلىك كومەك بەرىلۋدە. مەملەكەتتىڭ ءوز مىندەتتەرىن ورىنداۋدان باس تارتىپ وتىرماعانىن ءتۇسىنۋ كەرەك. ءبىراق، قازىر قىسىمعا بەرىلىپ، ميتينگكە شىققاندارعا پاتەر ءبولىپ بەرسەك، كۇنى ەرتەڭ پاتەر قالاپ، بارلىعى دا ميتينگكە شىعادى. سوندىقتان، ميتينگكە شىققانىنا نەمەسە شىقپاعانىنا قاراماستان، مەملەكەت كومەكتى حالىقتىڭ الەۋمەتتىك وسال توبىنا كەزەگىمەن كورسەتەتىن بولادى»، - دەدى داۋرەن ابايەۆ.