ەۋرازيادا ديالوگ قۇرۋدا الەم مەملەكەتتەرى ەلباسىنىڭ تاريحي ءرولىن داۋسىز مويىندايدى - داۋرەن ابايەۆ
ەۋرازيا ەلدەرى پارلامەنتتەرى ءتوراعالارىنىڭ IV كەڭەسىنىڭ قورىتىندىسى تۋرالى ق ر اقپارات جانە قوعامدىق دامۋ ءمينيسترى داۋرەن ابايەۆ وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«وسى اپتادا ەۋرازيا ەلدەرى پارلامەنتتەرى ءتوراعالارى ءتورتىنشى مارتە كەزدەستى. بۇعان دەيىن مۇنداي اۋقىمداعى كەزدەسۋلەر ماسكەۋدە، سەۋلدە جانە انتاليادا وتكەن ەدى. ءبىزدىڭ ەلوردا ءدال وسى اۋقىمدى شارانى وتكىزگەن ءتورتىنشى قالا بولدى. كوپتەگەن ساراپشى اتاپ وتكەندەي، قازىرگى كەزەڭدە پارلامەنتتىك ديپلوماتيانىڭ ماڭىزى قاتتى ءوسىپ كەلەدى. زاڭنامالىق دەڭگەيدەگى بايلانىستار بۇگىنگى كۇنى بۇكىل الەمدە داۋلى سۇراقتارعا نۇكتە قويادى. بۇنى وپ-وڭاي تۇسىندىرۋگە دە بولادى. بۇل ەلدەردىڭ پارلامەنتتەرىنىڭ ءبارىن حالىق سايلاپ العان. سول سەبەپتى، ءبىزدىڭ ەلگە 65 مەملەكەتتىڭ وكىلىنىڭ، ونىڭ ىشىندە سپيكەرلەرىنىڭ، 14 حالىقارالىق ۇيىم وكىلىنىڭ باس قوسۋى - وتە ۇلكەن ماڭىزدى جايدى بىلدىرەدى»، - دەدى داۋرەن ابايەۆ «حابار» ارناسىنداعى «اشىق ديالوگ» باعدارلاماسىندا.
ءمينيستردىڭ ايتۋىنا قاراعاندا، ايتۋلى قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ قاتىسۋى - حالىقارالىق شاراعا ەرەكشە مارتەبە بەرگەن.
«ءوز سوزىندە ەلباسى ەۋرازيالىق ديالوگتى ارى قاراي بەكەمدەۋدە ماڭىزدى ۇسىنىستارىن ايتتى. شارانىڭ ناتيجەسى تۋرالى ايتار بولساق، 18 پۋنكتتەن تۇراتىن اۋقىمدى قورىتىندى مالىمدەمەگە قول قويىلدى. وندا كەڭەسكە قاتىسۋشىلار ەۋرازيا كونتينەنتىندە ىنتىماقتاسۋ قاعيداتتارىنا ىنتالى ەكەندەرىن ءبىلدىردى. پارلامەنتارييلەر سونىمەن بىرگە ەۋرازيا اۋماعىندا نۇرسۇلتان نازاربايەۆتىڭ ينتەگراتسيالىق پروتسەستەردى بەكەمدەۋدە وراسان زور تاريحي ۇلەسىن ەرەكشە اتاپ ءوتتى. بۇل جەردە ماڭىزدى ءبىر نيۋانس بار: بۇل مالىمدەمە كونسەنسۋس نەگىزىندە قابىلداندى. ياعني، بارلىق 65 مەملەكەت قورىتىندى مالىمدەمەمەن كەلىسۋى كەرەك. ولار بۇل مالىمدەمەدە ءبىزدىڭ قۇرلىقتىڭ اۋقىمدى كەڭىستىگىندە ديالوگتى قۇرۋدا ەلباسىنىڭ تاريحي ءرولىن داۋسىز مويىندايدى»، - دەدى داۋرەن ابايەۆ.
ەسكە سالا كەتسەك، ساناۋلى كۇن بۇرىن تاۋەلسىزدىك سارايىندا ەۋرازيا ەلدەرى پارلامەنتتەرى ءتوراعالارىنىڭ IV كەڭەسى ءوتىپ، ەۋرازيا ەلدەرى پارلامەنتتەرىنىڭ ءتوراعالارى بىرلەسكەن مالىمدەمە قابىلداعان بولاتىن.
