بالا دامۋىنا شاحمات ويىنىنىڭ اسەرى

نۇر-سۇلتان. قازاقپارات - شاحمات - بۇل سپورت، عىلىم ءارى ونەر. ەگەر شاحماتشى جارىسقا قاتىسىپ، جەتىستىككە جەتسە، وندا بۇل ويىننىڭ سپورتتىق كورىنىسى.

 ەگەر ويىن بارىسىندا تىڭ ويلار تۋىنداپ، ەرەكشە جۇرىستەر بولسا، بۇل - ونەر. ال شاحماتشى ويىنعا دايىندىق بارىسىندا شاحمات جۇيەسىنىڭ تەوريالارىنا زەرتتەۋ جۇرگىزىپ، جاڭا جوسپار مەن يدەيا ويلاپ تاپسا جانە وسىنى شىنايى ويىندا جۇزەگە اسىرا بىلسە، بۇل شاحماتتىڭ عىلىمي تۇرعىسى. شاحمات ويناۋدى كەز كەلگەن ادام جانە كەز كەلگەن جاسىندا ۇيرەنە الادى. مىسالى الەم چەمپيوندارىنىڭ ءبىرى اناتولي كارپوۆ شاحمات ويناۋدى 4 جاسىندا ۇيرەنگەن. ال نەبارى 13 جاسىندا وسى كارپوۆتى جەڭگەن قازاق شاحماتشى قىزى جانسايا ابدىمالىك 8 جاسىندا- اق الەم چەمپيونى اتانىپ ۇلگەرگەن ەدى.

قازىرگى كەزدە كوپتەگەن بالا جەتى- سەگىز، كەيدە بەس جاسىنان باستاپ شاحماتپەن اۋەستەنە باستايدى. ارينە، ءار ادامنىڭ الەمدى قابىلداۋى ءارتۇرلى. ءبىرى تەز ءتۇسىنىپ، ەستە ساقتاپ الاتىن بولسا، ەندى ءبىرى اقىرىن ءجۇرىپ انىق باسادى. الايدا بالا بويىنداعى جەتكىلىكسىز قاسيەتتەردى وسى دانا ويىن ارقىلى سىڭىرۋگە بولادى. شاحماتپەن اينالىسۋ ادامنىڭ ءبىرشاما تۇلعالىق قىرىن جەتىلدىرەدى. شاحمات ويناپ جاتتىققاندا لوگيكالىق جانە تۇيسىكتىك ويلاۋ قابىلەتى داميدى، ۇزاقمەرزىمدى جانە قىسقاۋاقىتتىق ەستە ساقتاۋ قابىلەتى، ويدى شوعىرلاندىرۋ قاسيەتى جەتىلەدى. ويىن باسىرىندا شەشىم قابىلداۋدا ەرىك، شەشىمشىلدىك، ەموتسيالىق ۇستامدىلىق قالىپتاسادى. شاحمات ۋاقىتتى باعالاي بىلۋگە، توزىمدىلىككە، وتىرىك پەن شىندىققا تۋرا قاراۋعا ۇيرەتەدى. تەك قارسىلاسىڭا عانا ەمەس، ءوز- وزىڭە دە سىني تۇرعىدان قاراي باستايسىڭ. ول مەكتەپتە تاپسىرمالاردى جاقسى ورىنداۋعا عانا ەمەس، بالانىڭ ءوزىن ۇستاي بىلۋىنە، ءوز ارەكەتتەرىن باسقارىپ، جيناقتالۋعا سەپتىگى تيەدى.

Massaget.kz