قۇمنان تابىلعان قازىنا
قۇرمانعازى اۋداندىق تاريحي- ولكەتانۋ مۋزەيىنە بۇل جادىگەردى 1979 -جىلى ولكەتانۋشى ماقسوت جولجانوۆ تاپسىرىپتى. مۋزەي قىزمەتكەرى جازيرا ءمادىروۆا: «بۇل - ءبىزدىڭ زامانىمىزعا دەيىنگى II- III عاسىرلارعا جاتاتىن پاتەرا دەپ اتالاتىن ىدىستىڭ سابى، - دەيدى. - ەجەلگى ريمدە تاعام سالۋعا ارنالعان پاتەرانى كەيىن قۇرباندىققا سويىلعان مالدىڭ قانىن قۇيۋعا پايدالانعان. ىدىستىڭ سابى قولادان جاسالعان. قولا ءداۋىرىنىڭ حرونيكالىق شەگى ب. ز. ب. 4-مىڭجىلدىق پەن ب. ز. ب. 1- مىڭجىلدىقتىڭ باسىن قامتىدى. قولا - ءار- ءتۇرلى پروپورتسياداعى مىس پەن قالايىنىڭ، قورعاسىننىڭ قورىتپاسى» .
جادىگەرگە زەر سالساق، سابىنىڭ ۇشى ءمۇيىزدى قوشقار باسىنىڭ ناقىشىمەن بەينەلەنىپتى. ولكە تانۋشى ماقسوت جولجانوۆ پاتەرانىڭ سابىن قوشالاق وڭىرىنەن تاپقان. قوشالاق - «كيەلى ءار تاس مۇندا، ەندى اتتاۋ ۇيات- تى. تابانىڭنىڭ استىندا، ءبىر قۇپيا جازۋ جاتقان سياقتى» ، دەپ جىرلاعان اقىن جۇمەكەن ناجىمەدەنوۆتىڭ تۋعان جەرى.
«بۇيرا قۇمنىڭ ورتاسى - بۇيىرعىندى توبە جاي، كۇنگە جايعان تەرىدەي سور قورشاعان جاعالاي» ، دەپ اقىن شابىتىنا ارقاۋ بولعان قاسيەتتى مەكەن توپىراعىنا ءالى قانشا سىردى بۇگىپ جاتىر ەكەن؟ ..
«ەگەمەن قازاقستان»