وقۋشىنىڭ ءدىني ۇستانىمىن دۇرىس قالىپتاستىرۋ ماڭىزدى - نۇربولات ايەكەشوۆ
امان رەتىندە ءدىنتانۋشى، قالالىق قوعامدىق دامۋ باسقارماسىنىڭ «مونيتورينگ جانە تالداۋ» ورتالىعىنىڭ ءبولىم باسشىسى نۇربولات ايەكەشوۆ شاقىرىلدى.
جالپى 150 استام وقۋشى قاتىسقان كەزدەسۋدە دەسترۋكتيۆتى اعىمدار، سالدارى، قاۋپى تۋرالى ايتىلدى.
«قازاقستان زايىرلى مەملەكەت. مەملەكەتتىڭ قارەكەتتەرى ازاماتتىق زاڭ نورمالارىمەن رەتتەلىنەدى دە ءدىن ىستەرىنە ارالاسپايدى. ال ءدىننىڭ تىرشىلىگى ءدىني نورمالارمەن رەتتەلىنەدى، ول مەملەكەت جۇمىسىنا ارالاسپايدى. كونستيتۋتسيادا كورسەتىلگەن ار مەن ۇجدان بوستاندىعى تالاپتارى ادامدى سەنىمىنە جانە كوزقاراسىنا بايلانىستى قۋدالاۋعا تىيىم سالادى. الايدا ءدىن نورمالارى مەن تاجىريبەسى ازاماتتىق زاڭ نورمالارىنا قايشى كەلمەۋى كەرەك. ءبىزدىڭ مەملەكەتتىك مەكتەپتەردە ءوزىنىڭ ەرەجەلەرى بار. ونىڭ ءبىرى - مەكتەپ فورماسىنىڭ ۇلگىسى. «حيدجاب» دەگەن ءدىني ماركەر. مينيسترلىكتىڭ بىرەگەي فورما كيۋ تۋرالى ورتاق تالابى بار. ەڭ الدىمەن سىزدەر ءۇشىن ءدىني ماركەردى كورسەتۋ ەمەس، ءبىلىم الۋلارىڭىز ماڭىزدى. ءدىني قىزىعۋشىلىقتاردىڭ ارتى فاناتيزمگە اپارادى. ءار قادامدارىڭىزدى ابايلاپ، كەز كەلگەن رەسۋرستاردان اقپارات ىزدەمەۋ كەرەك»، - دەدى نۇربولات ايەكەشوۆ.
وقۋشىلار تاراپىنان ءدىني نانىم- سەنىمگە قاتىستى ءبىرقاتار سۇراقتار قويىلدى.
ونىڭ ىشىندە ءبىر وقۋشى ءدارىس بەرۋشىلەردىڭ كەلۋ ماقساتىن سۇرادى.
«ەستەرىڭىزدە بولسا رۋسلان كۋلەكبايەۆ اتىس جاسادى. ول جىگىت مەكتەپ جاسىنان باستاپ ءدىني اعىمدارعا كىرگەن. سىزدەردىڭ بولاشاق يدەيالارىڭىز، دۇنيەتانىمدارىڭىز، كوزقاراستارىڭىز مەكتەپ جاسىنان قالىپتاسادى. تەرروريستەر اياق استىنان ءوسىپ شىقپايدى. مەكتەپ جاسىنان باستاپ بالالاردا ۇستانىم پايدا بولۋى مۇمكىن. اتىراۋداعى، اقتوبەدەگى اتىستار سوعان دالەل. سول سەبەپتى سىزدەرمەن كەزدەسىپ، دۇرىس باعىت-باعدار بەرىپ، جات اعىمداردىڭ ىقپالى تۋرالى ماعلۇمات بەرۋ - مەملەكەت جۇرگىزىپ وتىرعان ساياساتتىڭ ۇدەسىنەن شىعادى. سول سەبەپتى، وقۋشىنىڭ ءدىني ۇستانىمىن دۇرىس قالىپتاستىرۋ ماڭىزدى»، - دەدى نۇربولات ايەكەشوۆ.
وقۋشى جاسىنداعى بالالاردىڭ ساناسىندا سان سۇراق تۋىنداۋى مۇمكىن. كەيدە بۇل سۇراقتارعا ءدىني ءبىلىمى جوق بولسا، اتا- انالار دا، مۇعالىمدەر دە جاۋاپ بەرە الماۋى ىقتيمال.
وسى ورايدا، بىلتىر قالالىق قوعامدىق دامۋ باسقارماسىنىڭ ۇيىمداستىرۋىمەن، قولداۋىمەن «مونيتورينگ جانە تالداۋ ورتالىعى» مۇعالىمدەردىڭ بىلىكتىلىگىن ارتتىرۋ كۋرستارىن جۇرگىزىلگەن بولاتىن.
«قازىر ءدىنتانۋ ساباعى فاكۋلتاتيۆتى تۇردە 9-سىنىپتاردا وتەدى. بۇل ساباقتى بىلتىر بىلىكتىلىگىن ارتتىرعان تاريحشى ماماندار وتكىزەدى. بىلتىرعى كۋرستاردا ۇستازدار تەك قانا تەوريالىق ءبىلىم الماي ءتۇرلدى ءدىني ورىندارعا بارىپ، ولاردىڭ تاريحىمەن تانىسقان بولاتىن»، - دەدى ءدىنتانۋشى مامان.
ءدارىستىڭ سوڭىنان تەرىس اعىمداردىڭ ىقپالى جونىندە ارنايى ۆيدەوفيلم كورسەتىلدى.
اۆتور: گۇلميرا عوسمانالي
