امەريكالىقتار قازاق ايەلدەرى تۋرالى

نۇر-سۇلتان. قازاقپارات - قازاق وتباسىلارىنىڭ كۇندەلىكتى تۇرمىس-تىرشىلىگىمەن تانىسقان ءبىر توپ امەريكالىق تۋريست اسەرلەرىمەن ءبولىستى.

Frendship Force مادەني الماسۋ باعدارلاماسى اياسىندا نۇر-سۇلتان قالاسىنا ا ق ش-تان ءبىر توپ ەرىكتىلەر كەلدى. الەمدە 1979 -جىلدان بەرى جۇمىس ىستەيتىن باعدارلاما ماقساتى ساياحاتتاۋ ارقىلى ءتۇرلى ۇلتتار مەن ۇلىستاردى تانۋ جانە مەملەكەتتەر اراسىن جاقىنداستىرۋ. ءبىر ەرەكشەلىگى، تۋريستەر قوناق ۇيگە توقتامايدى. جەرگىلىكتى جەردەگى وتباسىلاردىڭ ۇيىنە قوناقتايدى. ءسويتىپ، ولاردىڭ كۇندەلىكتى تۇرمىس-تىرشىلىگىمەن جەتە تانىسادى. نۇر-سۇلتان ارقىلى وڭتۇستىك كورەياعا بەت العان امەريكالىقتار قازاقتاردى العاش رەت كورگەن. ءبىر توپ تۋريست «Azattyq Ruhy» تىلشىسىمەن العان اسەرلەرىمەن ءبولىستى.

- ءسىز كوپتەگەن امەريكالىقتاردىڭ ءالى كۇنگە دەيىن قازاقستان تۋرالى بىلمەيتىنىن ايتتىڭىز؟

Сurtis Zerr :

- ءيا، ول راس. امەريكالىقتار قازاقستان جايلى وتە از بىلەدى. ءبىراق مەن ەلگە قايتقان سوڭ، نۇر-سۇلتاننىڭ گۇلدەنىپ، حالىقارالىق دەڭگەيدەگى شاھارعا اينالىپ جاتقانى تۋرالى مىندەتتى تۇردە ايتامىن. بۇل جەردىڭ تۇرعىندارى وتە اقىلدى، مەيىرىمدى ەكەن. قىتاي مەن رەسەي سياقتى الىپ ەلدەر اراسىندا ورنالاسۋ وڭاي ەمەس. سوعان قاراماستان قازاقستان بيلىگى قىرۋار شارۋا اتقاردى. بۇرىنعى جىبەك جولىن جانداندىردى. ەۋرووداق ەلدەرىمەن، رەسەيمەن، قىتايمەن ساۋدا-ساتتىق داميتىنىنا سەنەمىن. ا ق ش-تا ءوزارا ىنتىماقتاستىققا قىزىعۋشىلىق تانىتادى.

...ءبىر قىزىعى - ءبىز ۇشاق بيلەتىن «استاناعا» العانبىز، ءبىراق نۇر-سۇلتانعا كەلدىك. قالانىڭ اتىن ناۋرىز ايىندا اۋىستىرىپ جىبەرىپتى. بۇل ءبىر تاڭعالارلىق ءجايت بولدى.

Steve Dunn:

- مەن وسى ەلدە وتە اقىلدى، جىگەرلى، تاربيەلى ايەلدەردى كوردىم. ولارعا ەر ادامدارمەن تەڭ مۇمكىندىكتەر بەرىلىپ، لايىقتى قۇرمەتكە يە بولعانى دۇرىس. سەبەبى ولار شىنىمەن مىقتى، قولدارىنان ءىس كەلەتىن جاندار. ايەلدەرىنە قاتال قارايتىن ءداستۇرلى وتباسىلاردى دا بايقادىق. ول دا ءجون شىعار. ءبىراق، قازاق ايەلدەرى دە كاسىبي تۇرعىدا دامۋعا مۇمكىندىك الۋ كەرەك دەپ ەسەپتەيمىن.

Сurtis Zerr :

- مەن دە وتە ءبىلىمدى ايەلەردى كەزدەستىردىم. مۇمكىن ايەلدەردى قوعامدىق ىستەرگە كوبىرەك ارالاستىرسا، ەل بۇدان دا قارقىندى داميتىن شىعار. ولارعا ەرلەرمەن بىردەي مۇمكىندىك، ۋاقىت بەرىلۋى كەرەك.

- ا ق ش-قا كوشكىسى كەلەتىن قازاقستاندىقتار تۋرالى نە ايتاسىز؟

Steve Smith:

- ارينە قازاقتاردى ءارقاشان قۇشاق جايا قارسى الۋعا دايىنبىز. ءبىراق سىزدەرگە وسى ەلدە، وسى جەردە مول مۇمكىندىك بار. قاراڭىزشى، ءبارى وتە جىلدام دامىپ جاتىر. قالاي عانا وسىنى بايقاماۋعا بولادى؟!

- قازاقستاندى ءوزىڭىز بارعان قاي ەلمەن سالىستىرار ەدىڭىز؟

Lynn Harrington:

- قازاقستاننىڭ رەسەيمەن ۇقساس تۇستارى وتە كوپ. سەبەبى بۇل ەل تالاي جىل رەسەيدىڭ ەرەجەلەرىمەن ءومىر ءسۇردى. قوناقجايلىلىق، قۇندىلىقتار سايكەستىگى انىق بايقالادى.

Steve Dunn:

- مەن قازاقستان تۋرالى العاش ەستىگەندە بىردەن ءتۇر-تۇرپاتى ورىستار سياقتى شىعار دەپ ويلادىم. ويتكەنى، رەسەيدىڭ قۇرامىندا بولدىڭىزدار عوي. وسىندا كەلىپ، ادامدارمەن كەزدەسىپ، قالانى ارالاپ كورگەن سوڭ، قازاقستان جايلى شىنىمەن ەشتەڭە بىلمەيتىنىمدى ۇقتىم. قازاقتاردىڭ ەجەلدەن وتباسى قۇندىلىقتارىن قۇرمەتتەيتىنىن ەستىگەنمىن. سول تاريحي ەرەكشەلىكتىڭ ءالى كۇنگە ساقتالىپ كەلە جاتقانى تاڭعالدىردى.

- ال وسىنداعى «ءداستۇرلى ەمەس» وتباسىلار تۋرالى نە ويلايسىز؟

Steve Dunn:

- مەن ولاردى بۇل جەردەن كەزدەستىرگەم جوق. ءبىراق بار دەپ ويلايمىن. گوموسەكسۋالداردىڭ نەكەلەسۋى بۇكىل الەمدە كەڭ تارالعان عوي. ءبىز تەك ءۇبىرلى-ءشۇبىرلى وتباسىلاردى كوردىك. بالالارى وتە باقىتتى. ارينە، وسىنداي ءداستۇرلى وتباسى بولعانى قۇبا-قۇپ...

سۇحباتتاسقان - اباي سەيفۋللا ۇلى