قازاق بالۋاندارى الەم چەمپيوناتىن جەڭىسپەن باستادى

نۇر- سۇلتان. قازاقپارات - بۇگىن كۇرەس تۇرلەرىنەن ەلوردا تورىندە الاۋى تۇتانعان الەم چەمپيوناتىندا قازاق بالۋاندارى العاشقى بەلدەسۋلەرىن جەڭىسپەن باستادى، دەپ حابارلايدى قازاقپارات ءتىلشىسى.

قازاق بالۋاندارىنىڭ اراسىنان العاش بولىپ كىلەمگە شىققان 72 كەلىدەگى دەمەۋ جادىرايەۆ ءبىرىنشى بەلدەسۋىندە قارسىلاسىن 9:0 ەسەبىمەن جەڭىپ، كەزدەسۋدى مەرزىمىنەن بۇرىن اياقتادى. الايدا دەمەۋ جادرايەۆ 2-  كەزدەسۋىندە گەرمانيالىق قارسىلاسىنا 4:3 ەسەبىمەن ەسە جىبەردى. 63 كەلىدە باق سىنايتىن المات كەبىسپايەۆ العاشقى كەزدەسۋدە ءۇندىستاندىق قارسىلاسىن جەڭىپ، كەلەسى اينالىمعا ءوتتى.

كۇرەس تۇرلەرىنەن الەم چەمپيوناتىندا گرەك- ريم كۇرەسىنەن 82 ك گ سالماقتا ەل نامىسىن قورعاعان ماقسات ەرەجەپوۆ 2- كەزدەسۋىندە بەلارۋستىك قارسىلاسىن (ۆيكتار ساسۋنوۆسكي) 2:1 ەسەبىمەن جەڭدى. ەندى 55 كەلىدە قورلان جاقانشا سىنعا تۇسەدى.

ايتا كەتەيىك، الەم چەمپيوناتىنا 104 مەملەكەتتەن مىڭنان استام بالۋان سىنعا تۇسەدى. ولاردىڭ قاتارىندا 60 وليمپيادا ويىندارىنىڭ چەمپيوندارى مەن جۇلدەگەرلەرى بار. الەم چەمپيناتىن قازسپورت تەلەارناسى تىكەلەي ەفيردە كورسەتىپ جاتىر.

اۆتور: كۇنسۇلتان وتارباي