پرەزيدەنتتىڭ قىتايعا ساپارى وتە جوعارى دەڭگەيدە ءوتتى - بەرىك ءۋالي
بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە ق ر پرەزيدەنتىنىڭ باسپا ءسوز حاتشىسى بەرىك ءۋالي ايتتى، دەپ حابارلايدى قازاقپارات ءتىلشىسى.
«مەملەكەت باسشىسى قاسىم- جومارت توقايەۆ مىرزا قىتاي حالىق رەسپۋبليكاسىنا ەكى كۇندىك مەملەكەتتىك ساپارمەن بارىپ قايتتى. ساپار وتە ناتيجەلى، جوعارى دەڭگەيدە ءوتتى دەپ ايتۋعا تولىق نەگىز بار. ونىڭ ناتيجەسىندە قازاقستان مەن قىتاي كوشباسشىلارى بىرلەسكەن مالىمدەمە جاساپ، 10 ماڭىزدى قۇجاتقا قول قويىلدى. جالپى، ق ح ر ءتوراعاسى شي جينپين مىرزا مەن قاسىم- جومارت توقايەۆتىڭ اراسىندا وتە جوعارى دەڭگەيدەگى كەلىسسوز ءوتتى. مۇنان بولەك پرەزيدەنت كورشى ەلدىڭ ءبىرقاتار مەملەكەت قايراتكەرىمەن، ىسكەر توپ وكىلدەرىمەن جۇزدەستى. قىتاي قوعامدىق عىلىمدار اكادەمياسىنىڭ ۇستازدارىمەن، ستۋدەنتتەرىمەن كەزدەسىپ، ولاردىڭ الدىندا ءدارىس وقىدى. سونىمەن قاتار سول جاقتا وقىپ جۇرگەن ستۋدەنتتەرىمىزبەن دە كەزدەستى» ، - دەدى بەرىك ءۋالي.
ونىڭ اتاپ وتۋىنشە، مەملەكەت باسشىسى حاڭجوۋ قالاسىندا قىتايدىڭ الەمدىك نارىققا يننوۆاتسيالىق ونىمدەرىن شىعاراتىن Hikvision كومپانياسىنىڭ جانە جاھاندىق ينتەرنەت ساۋدا سالاسىنىڭ كوشباسشىسى سانالاتىن Alibaba Group كومپانياسىنىڭ شتاب- پاتەرىندە بولعان. كومپانيانىڭ نەگىزگىن قالاعان جەك مامەن كەزدەسكەن. قازاقستان پرەزيدەنتى جەك ماعا قازاقتىڭ ۇلى اقىنى ابايدىڭ 175 جىلدىعىنا وراي الەمدىك چەللەندجگە ءۇن قوسقانى ءۇشىن ريزاشىلىعىن بىلدىرگەن.
«جالپى، كورشىلەس ەلدەردىڭ ىنتىماقتاستىعىن ارتتىراتىن كەلەلى كەلىسىمدەر جاسالعان، ۇزاق مەرزىمدى ستراتەگيالىق قارىم- قاتىناستى نىعايتا تۇسكەن جەمىستى ساپار بولدى دەپ نىق سەنىممەن ايتا الامىز. وزدەرىڭىز بىلەسىزدەر، قازاقستان تەرريتوريالىق تۇرعىدان الەمدەگى ەكى الىپ مەملەكەتپەن قۇرلىقتاعى شەكاراسى بار. ونىڭ ءبىرى رەسەي بولسا، شىعىسىمىزدا - قىتاي مەملەكەتى. قازىرگى تاڭدا ەلىمىزدىڭ 1782 شاقىرىم شەكاراسى وسى قىتايمەن شەكتەسەدى. بۇل ۇلكەن قۇرلىقتىق شەكارا بولىپ ەسەپتەلەدى. كورشىلەس، ىرگەلەس تۇرعان ەلمەن ارالاسپاي، الىس- بەرىس جاساماي تۇرا المايمىز. ويتكەنى، قىتاي ءبىزدىڭ قۇداي قوسقان كورشىمىز. سول سەبەپتى قىتايمەن بايلانىسىمىزدى ورنىقتىرۋىمىز، ماڭگىلىك ستراتەگيالىق ارىپتەستىك ورناتۋىمىز زاڭدىلىق» ، - دەدى پرەزيدەنتتىڭ باسپا ءسوز حاتشىسى.
