جيىرما جىل وق پەن وتتىڭ ورتاسىندا جۇرگەن ءتىلشى
كۇننىڭ ەكىنشى جارتىسىندا مەديا سالاسىنىڭ ماماندارىنا ارنالعان ماستەر- كلاسس ۇيىمداستىرىلدى. اسىرەسە اسا قاۋىپتى وقيعالاردىڭ ورتاسىندا ءجۇرىپ حابار تاراتۋعا ماشىقتانعان اسكەري جۋرناليست وزگىر ءيورۋلدى تىڭداۋعا كەلگەندەردىڭ قاتارى كوپ بولدى.
تۇركيالىق (Ihlas Haber Ajansi) جاڭالىقتار اگەنتتىگىنىڭ ءوندىرىس جونىندەگى ديرەكتورى وزگىر يورۋل جۋرناليستىك جولىن 18 جاسىندا باستاعان. ونىڭ ماماندىعىنا بەرىلگەنى سونشالىق، مايدان دالاسىنان تالاي حابار تاراتقان. الەمنىڭ ءار جەرىندەگى سوعىس وشاقتارىنان اقپارات بەرىپ كەلگەن ول، ءتىپتى ساددام حۋسەيننىڭ وزىنەن سۇحبات العان. Astana Media Week شاراسىنا ارنايى كەلگەن مەيمان ءوزى قىزمەت ەتەتىن ءىنا جاڭالىقتار اگەنتتىگىنىڭ جۇمىس بارىسى تۋرالى ايتىپ بەردى.
̶ ارىپتەستەرىم سوعىس بولىپ جاتقان وڭىرلەردى ارالاپ، حالىققا اقپارات تاراتىپ كەلەدى. ءبىز كوبىنە قانتوگىس بولعان جەردە جۇرەمىز. جۇمىس بارىسىمەن اسكەري قاقتىعىستار بولعان يندونەزيا، اۋعانستان، يراك، اراب ەلدەرىندە، سيريادا بولدىق. العاشقى جۇمىسىمدى وپەراتور رەتىندە باستادىم. بالقانداعى قاقتىعىستاردا، يندونەزياداعى ءزىلزالادا، باعداتتاعى شايقاس ورىندارىندا بولدىم. سوڭعى 20 جىلدا الەم تاريحىنىڭ ماڭىزدى بولشەگىنە اينالعان وقيعالاردىڭ ورتاسىندا جۇردىك» ، دەيدى وزگىر يورۋل.
تۇركيالىق جۋرناليست ەڭبەك جولىن 1997-1998 -جىلدارى بالقانداعى قاقتىعىس ايماعىندا اقپارات جەتكىزىپ وتىرۋدان باستاعان. ونىڭ ايتۋىنشا، جاڭالىق تاراتۋدا ءتىلشىنىڭ شەبەرلىگىنەن بولەك ۇجىمدىق بايلانىستىڭ دا ءرولى زور.
̶ ءبىز وقيعانىڭ ەپيتسەنترىنە باسەكەلەستەرىمىزدەن بۇرىن جەتۋدى ماقسات تۇتامىز. ۇجىمدىق جۇمىس وسى كەزدە ماڭىزدى. قاقتىعىس ورىندارىنان جاڭالىقتى ۋاقتىلى جولداۋ ءۇشىن ەكى نەمەسە ءتورت ادامنان تۇراتىن كوماندا جاساقتالادى. ولار تىزە قوسىپ، جۇمىلا ارەكەت ەتكەندە عانا ناتيجەگە جەتەدى.
قاتار، يوردانيا ەلدەرىندە ورىن العان قاقتىعىس كەزدەرىندە ۇرەي قۇشاعىندا بولعان ەدىك. ءبىر كەزدەرى بىرلەسە وتىرىپ، ساددام حۋسەيننىڭ ەسكەرتكىشى بۇزىلىپ جاتقان جەردەن تىكەلەي جاڭالىق تاراتتىق. سوندىقتان ءبىزدىڭ جۇمىستاعى نەگىزگى پوزيتسيا - ءوزارا ءتۇسىنىسۋ. ەگەر كومانداداعى ەكى ادام ءبىر- بىرىمەن ۇعىسپاسا، جاڭالىقتى ۋاقتىلى نەمەسە ساپالى بەرە الماي قالۋى مۇمكىن. ياعني، كوماندالاستاردىڭ بارلىق جۇمىسى ۇيلەسىمدى بولۋى ءتيىس، - دەيدى ول.
اسكەري ءتىلشى قانشا قاۋىپ ءتونىپ تۇرسا دا، قاقتىعىس ايماعىنان اسىعىس كەتىپ قالۋعا بولمايتىن كورىنەدى. ويتكەنى، ول جاعدايدى زەردەلەپ قانا، كورەرمەندەرگە ناقتى دەرەكتەردى ۇسىنۋى كەرەك. قاتارداعى تىلشىدەن اسكەري ءتىلشىنىڭ ايىرماشىلىعى وسى بولسا كەرەك. سونىمەن قاتار بۇل سالا ادامنىڭ جان- جاقتىلىعىن تالاپ ەتەدى.
̶ مەن بىرنەشە رەت ولىممەن بەتپە- بەت كەلدىم. قيراعان عيماراتتاردا بوي تاسالادىق. جان- جاعىڭنان زۋلاعان وقتىڭ دىبىسىن ەستۋدىڭ ءوزى قاسىرەت. ءتىپتى ءبىر رەت جارالاندىم دا. قانسىراپ جۇرگەنىمە قاراماستان كامەراعا ءتۇسىپ، جۇمىسىمدى جالعاستىرا بەردىم. بۇل ۆيدەودا مەن اسكەري قاقتىعىس تۋرالى بىلگەنىمنىڭ ءبارىن ايتا كەلىپ، جاقىندارىممەن قوشتاسقانىم دا ەسىمدە. سوسىن ەسىمنەن تانىپ قالىپپىن. باقىتىمىزعا وراي، اسكەري دارىگەرلەر مەنى قۇتقاردى. جالپى، العاش سوعىس دالاسىنا كەلگەندە كوكەيىمدە «ولسەم، دەنەم تۇركياعا جەتكىزىلە مە؟ انام نە ويلايدى؟ » دەگەن سۇراقتار تۇراتىن. سودان كەيىن بىرتە- بىرتە ەتىم ۇيرەنىپ، ءولىم تۋرالى ەمەس، جۇمىس تۋرالى ويلاي باستادىم، - دەيدى ءو. يورۋل.
ول جيىرما جىلدان استام اتقارعان قىزمەتىنە بايلانىستى پاكىستاندا، اۋعانستاندا، پالەستينادا، يراكتا، كوسوۆودا جۇمىس ىستەدى. گرۋزياداعى ازاماتتىق سوعىس تۋرالى جاڭالىق سيۋجەتتەرىن دايىندادى. ونىڭ ارحيۆىنەن كوپتەگەن وقيعانىڭ بەينەجازبالارىن كەزدەستىرۋگە بولادى. سەمينار بارىسىندا جينالعان قاۋىم سونداي تۋىندىلاردىڭ بىرنەشەۋىن تاماشالاپ ۇلگەردى.
