وزبەكستانداعى قازاق كاسىپكەرلەرى اتا جۇرتپەن بايلانىس ورناتۋعا نيەتتى

نۇر- سۇلتان. قازاقپارات -  وزبەكستاندا تۇرىپ جاتقان قازاقتىڭ ىسكەر ازاماتتارى اتا جۇرتپەن بايلانىس ورناتۋعا نيەتتى. ءتىپتى بيزنەسكە قىز- كەلىنشەكتەر دە قىزىعۋشىلىق تانىتىپ وتىر.

 بۇل تۋرالى تاشكەنتتە وتانداستار قورىنىڭ ۇيىمداستىرىلۋىمەن وتكەن بيزنەس- فورۋمدا ايتىلدى. مۇنداي فورماتتاعى بيزنەس- فورۋم وزبەكستاندا العاشقى رەت وتكىزىلىپ وتىر. دياسپورا وكىلدەرى تاراپىنان سۇراقتار مەن ۇسىنىستار وتە كوپ بولدى. شارانى ۇيىمداستىرۋشىلار ەلباسى باستاماسىمەن قۇرىلعان قوردىڭ نەگىزى باعىت- باعدارىن تانىستىردى. ءوزارا ىسكەرلىك قارىم- قاتىناس ورناتۋ جانە شەتەلدەگى قانداستارىمىزدى بىرىكتىرۋگە باعىتتالعان «قازاق مادەني- ىسكەرلىك ءۇيىنىڭ» جۇمىسىن جانداندىرۋ جاعى تالقىلاندى. قازاقستاندا بيزنەس وكىلدەرى ءۇشىن جاسالىپ جاتقان مۇمكىندىكتەر مەن ستارتاپتاردى قولداۋ، بىرلەسكەن كاسىپورىن قۇرۋ جانە ەكسپورت ماسەلەسى ءتۇسىندىرىلدى.

ارعىن وسپانوۆ، دۇنيە ءجۇزى قازاقتارىنىڭ قاۋىمداستىعى ءتوراعاسىنىڭ ورىنباسارى:

 -  كەزدەسۋدىڭ ناتيجەسى وتە زور بولدى. قازاقستاننىڭ قازىرگى ەكونوميكا جاعىنداعى جەتىستىكتەردى ايتىپ بەردىك. سودان كەيىن وسى جاقتاعى اعايىنداردىڭ پىكىرىن تىڭدادىق. ءبىرتالاي يدەيا بولدى. فورۋم اياسىندا قور مۇشەلەرى وزبەكستانداعى قازاق كاسىپكەرلەرىنىڭ جۇمىس ورىندارىن ارالاپ، كورشى ەلدەگى بيزنەس وكىلدەرىنە جاسالىپ جاتقان جاعدايلارمەن دە تانىستى. سوڭعى كەزدەرى وزبەكستاندا بيلىك پەن بيزنەسكە قىز- كەلىنشەكتەر دە كوپتەپ كەلە باستادى. ويتكەنى ايەل تەڭدىگى تۋرالى زاڭ قابىلداندى. قازاق قىزى كلارا سادىربايەۆا زەينەت جاسىندا بولسا دا وزبەكستان جاستارىنىڭ قازاقستاندا ءبىلىم الۋىنا قولداۋ كورسەتىپ كەلەدى. ەندى ىسكەر ايەل نۇكىس قالاسىندا شاعىن ۇن ديىرمەنىن اشپاق ويى بار. قازاقستاننان بيداي الىپ، تاريحي وتانىنا كۇرىش جەتكىزبەك.

كلارا سادىربايەۆا، دياسپورا وكىلى:

 -  پرەزيدەنتىمىز بىزگە جان جاقتى قولداۋ كورسەتىپ جاتىر. قازاقستان مەن وزبەكستاننىڭ اۋىز بىرشىلىگىنىڭ، دوستىعىنىڭ تىنىشتىعىنىڭ ارقاسىندا وسى جوسپارلاردى ۇلكەن دەڭگەيدە كورسەتۋ كەرەك. فورۋم اياسىندا دۇنيە ءجۇزى قازاقتارىنىڭ قاۋىمداستىعى مەن وتانداستار قورى جانە وزبەكستانداعى قازاق ۇلتتىق- مادەني ورتالىعى اراسىندا ءۇش جاقتى ىنتىماقتاستىق تۋرالى مەموراندۋمعا قول قويىلدى. بۇعان دەيىن ىستامبۇل، ميۋنحەن جانە سان- فرانسيسكو قالالارىندا وتكەن كەزدەسۋ الدا  ۇلىبريتانيا، رەسەي مەن قىتايدا جالعاسپاق. نەگىزگى ماقسات -  ەكى ەلدىڭ ەكونوميكا سالاسىندا قارىم- قاتىناستى نىعايتۋ، سونىڭ ىشىندە قانداستارىمىزدىڭ بيزنەسىن كوتەرۋ، دەيدى شارانى ۇيىمداستىرۋشىلار.

اۆتورلارى: قانات جۇنىسبەكوۆ تيمۋر يسمايلوۆ

www.24.kz