قازاقستان ءبىرقاتار ەلدە ساۋدا وكىلدىكتەرىن اشادى

بۇل تۋرالى ۇكىمەت ۇيىندە وتكەن باسپا ءسوز ءماسليحاتىندا ق ر ساۋدا جانە ينتەگراتسيا ءمينيسترى باقىت سۇلتانوۆ ءمالىم ەتتى، دەپ حابارلايدى قازاقپارات ءتىلشىسى.

«قازاقستاندىق ءونىمدى شەتەلگە ىلگەرىلەتۋ جانە سۇيەمەلدەۋ ءۇشىن ەكسپورتتاۋشىلارعا « ءبىر تەرەزە» قاعيداتىن قولداناتىن «QazTrade» تارتىلاتىن بولادى. ول ەكسپورتتاۋشى مەن مەملەكەتتىك ورگان اراسىندا اگەنت ءرولىن اتقارادى. ءبىزدىڭ ساۋدا وكىلدىكتەرىمىز دە شەتەلدە «QazTrade رەتىندە سىرتقى كەڭسەلەر بولىپ اشىلادى» ، - دەدى مينيستر.

 ونىڭ سوزىنە قاراعاندا، اعىمداعى جىلدىڭ سوڭىنا دەيىن ساۋدا وكىلدىكتەر جەلىسىن كەڭەيتۋ جوسپارلانعان. الەمدىك تاجىريبەدە ساۋدا وكىلدىكتەرى ساۋدا قاتىناستارىن كەڭەيتۋدىڭ نەگىزگى جانە ءتيىمدى قۇرالدارىنىڭ ءبىرى بولىپ سانالادى.

«قوسىمشا كەڭسەلەر قىتايدا، جاڭا وكىلدىكتەر تۇركيادا، ءۇندىستاندا، يراندا، وزبەكستاندا، اۋعانستاندا، پولشا مەن چەحيادا اشىلۋى جوسپارلانىپ وتىر. بۇل كەڭسەلەردە قازاقستاندىق تاۋارلاردى شەتەل نارىعىندا ىلگەرىلەتۋ ءۇشىن ءبىزدىڭ بىلىكتى «لوببيستەر» جۇمىس ىستەيتىن بولادى. وڭىرلىك جانە شەكارا ماڭىنداعى ساۋدانى دامىتۋ كوزدەلگەن. الەۋمەتتىك كاسىپتىك كورپوراتسيا بازاسىندا وڭىرلىك ەكسپورتتاۋشى ورتالىقتار قۇرۋ جوسپارلانىپ وتىر، ولاردىڭ قىزمەتىن «QazTrade» ۇيلەستىرەتىن بولادى» ، - دەدى باقىت سۇلتانوۆ.