يرۆين يالومنىڭ اقيقات ءپالساپاسى
ول - پسيحولوگيا عىلىمىن تانىمال ەتۋگە ۇلەس قوسقان ادام. ءوز ەڭبەكتەرىندە ول ماحاببات تۋرالى كوپ جازادى. ءوزىنىڭ جان جارى مەريلين يالوممەن 15 جاسىندا تانىسقان ەكەن.
يالوم وتباسى 60 جىل بىرگە تاتۋ-ءتاتتى عۇمىر كەشىپ، 4 بالانى ءوسىرىپ، ۇيادان ۇشىردى.
يرۆين يالوم - گۋمانيستىك پسيحولوگيانىڭ ءىزباسارى. بۇل باعىتتا جۇمىس ىستەيتىن دارىگەرلەر ءار پاتسيەنت ەرەكشە قۇبىلىس دەپ باعالايدى. ورتاق ەم جولى جوق دەگەندى ايتادى.
يالوم - باسىڭا كۇن تۋعاندا جانىڭا دەمەۋ بولاتىن ەرەكشە ناقىل سوزدەردىڭ يەسى. بىلە ءجۇرىڭىز…
قارىم-قاتىناس تۋرالى
- ەشكىم ەستىمەيتىن كەزدە ايقايلاپ ال…
- ءبىر نارسەنى سانامەن جانە جۇرەكپەن ءتۇسىنۋدىڭ اراسىندا تەرەڭ قۇز جاتىر - وتە تەرەڭ قۇز.
- رومانتيكالىق ماحاببات كولەڭكەدە جايقالادى، قادالىپ قاراساڭ - سولىپ قالادى.
- ەرتە مە، كەش پە كەز كەلگەن قارىم-قاتىناس اياقتالادى. ەشبىرىنە ومىرلىك كەپىلدىك جوق. - وزگە جانمەن تولىققاندى بايلانىس ورناتۋ ءۇشىن الدىمەن وزىڭمەن بايلانىستى رەتتە.
ەگەر ادام ءوز جالعىزدىعىن تۇسىنە الماسا، وندا وزگەنى جالعىزدىقتان قۇتىلۋدىڭ امالى دەپ قانا قاراستىرادى.
- ماحاببات ءاردايىم قايعى ارالاس بولادى.
- بىرەۋگە تولىق تاۋەلدى بولۋ - بۇل ءبىر باسقا، ال باسقا جانمەن تەڭ قۇقىلى ءومىر ءسۇرۋ - مۇلدە باسقا نارسە.
- دوسىڭدى كەشىرۋ دۇشپاندى كەشىرگەننەن قيىن.
- ەشكىم ەشقاشان وزگە ءۇشىن ەشتەڭە ىستەمەيدى. ءىس- ارەكەتتىڭ ءبارى وزىمىزگە باعىتتالادى. جاساعان جاقسىلىعىڭ - ءوزىڭ ءۇشىن جاساعانىڭ. ماحابباتىڭ - وزىڭە ارنالعان ماحاببات.
تەرەڭىرەك قازبالاساق - ادام باسقالاردى سۇيمەيدى، سول ادامنىڭ جانىنداعى ءوزى سەزىنەتىن تاماشا كۇيگە ەلىتەدى. ءار ادام ەلىتكەن سەزىمگە ەرەدى، ەلىتكەن ادامدى سۇيمەيدى.
باقىتتى ىزدەۋ
- ءومىردىڭ قۇپياسىن اشاتىن كىلتتى تاپتىم: بىرىنشىدەن، قالاعانىڭدى تىلە، ەكىنشىدەن، قالاعانىڭدى ءسۇي. ەگەر ءوزىڭدى قۇرمەتتەگىڭ كەلسە، قۇرمەتكە لايىق ءىس ىستە.
- لايىقتى ءومىر سۇرسەڭ، ءوزىڭ دە بايقاماستان جاقسىلىق جاساۋعا بەيىمدەلەسىڭ.
- قاباعىڭدى ءتۇيىپ، ەشكىمگە پەيىلىڭدى بەرمەي، جابىرقاپ ءجۇرۋ - ءومىر مەرەكەسىندە بار قىزىقتان قۇر قالۋ.
- ارسىزدىقپەن ءومىر سۇرگەنشە ابىروي-بەدەلسىز قالعان وڭاي.
- شاحماتتا - ءبارى ومىردەگىدەي: ءبىر پارتيا بىتكەندە بارلىق تاس - ءبىر جاشىككە تۇسەدى. - ءبىز ءبىر ساباقتى جاقسى تۇسىندىك: ءومىردى كەيىنگە قالدىرۋعا بولمايدى، ونى قازىر ءسۇرۋ كەرەك، دەمالىستى، جەكسەنبىنى، ءساتى تۇسەر شاقتى كۇتىپ جۇرە بەرۋگە بولمايدى.
بالالار وقۋىن ءبىتىرسىن، زەينەتكە شىققاندا ىستەيمىن دەپ ءبارىن كەيىنگە ىسىرا بەرگەن دۇرىس ەمەس. «راكپەن اۋىرعالى عانا ءومىردىڭ قادىرىن ءتۇسىندىم، قانداي وكىنىشتى» دەگەن ءسوزدى قانشاما رەت ەستىگەنىمدى بىلسەڭىزدەر عوي…
باسىڭا كۇن تۋعاندا
- ەسكە ال جالعىزدىق اينالاڭدا ادامداردىڭ بارىنا، نە جوعىنا تاۋەلدى ەمەس.
- ەڭ دۇرىس اقيقات - ءوز باسىڭنان وتكەن تاجىريبەدەن ەت-جۇرەگىڭمەن قوسا قانىن سورعالاتىپ جۇلىپ العان اقيقات.
- تورىعۋ - بۇل ادامنىڭ ءوزىن- ءوزى تانۋىنا تولەيتىن اقىسى. ءومىردىڭ تەرەڭىنە ۇڭىلگەن سايىن - تورىعۋدى كورەسىز.
- اعاش بيىك ءارى تاكاپپار بولىپ ءوسۋ ءۇشىن داۋىلعا مۇقتاج.
- كەيدە تاعدىر ءبىزدى «دۇرىس تاڭداۋ - قاتەلىك» بوپ شىعاتىن جاعدايعا تىرەپ قويادى. -- ۋايىمنىڭ ءبارىن قولدان جاساپ الامىز. قولدان جاساعاننىڭ ءبارىن ءوزىمىز جويا الامىز.
- ۋىسقا تۇسكەننىڭ ءبارى كوبىنە وزىمىزگە يەلىك ەتىپ كەتەدى.
- شىڭنىڭ ءبارىنىڭ ورتاق قيىندىعى - ارى قاراي ەڭىسكە تۇسىرەتىنى.
- ۇندەمەي جۇتىپ قويعان رەنىشكە ۋلانىپ قالۋعا بولادى.
- سەنىمدىلىك - الدىن الا قۇلاعدار بولۋعا تۋرا پروپورتسيونال. تاكاپپارلىق پەن داراقىلىقتىڭ استارىندا وزىنە سەنىمسىزدىك، ۇيات پەن ءوزىن كەم ساناۋ بار.
كەي ادامدار ءۇشىن جەتىستىك - وزگەلەردەن ارتىق ەكەنىن كورسەتۋ؛ بوتەن ادامدار ويىن ءبىلىپ قويادى دەپ قورقادى، وزگەلەر بۇدان دا زور جەتىستىككە جەتىپ، كەك الادى دەپ ۇرەيلەنەدى.
- كرەاتيۆ پەن ەمەن-جارقىن مىنەز قايعىدان تۋادى.
- ءوز ءومىرىمىز ءۇشىن باسى ءبۇتىن جاۋاپتىمىز. تەك ارەكەت ءۇشىن ەمەس، ارەكەتسىزدىك ءۇشىن دە جاۋاپتىمىز.
اۆتورى: اۋدارعان - شىنار ءابىلدا
