قىز جىبەكتىڭ ساۋكەلەسىن كىم تىككەن

نۇر-سۇلتان. قازاقپارات - ەكى جاستىڭ ماحابباتىن ءسوز ەتە وتىرىپ ەكى رۋدىڭ قارىم- قاتىناسىن، سول ارقىلى تۇتاس قوعامنىڭ كورىنىسىن كوزىقاراقتى كورەرمەنگە كوركەم جەتكىزە بىلگەن «قىز جىبەك» فيلمىنىڭ جارىققا شىققانىنا جارتى عاسىرعا جۋىق ۋاقىت ءوتىپتى.

سول ءبىر قايتالانباس كادرلەردە وتكەن كۇندەر ورنەكتەلسە دە ماحاببات تاقىرىبى قاي زاماندا دا وزەكتى. مىنە سوندىقتان، س. قوجىقوۆتىڭ بۇل بىرەگەي كينوتۋىندىسى ءالى كۇنگە حالىق اراسىندا زور سۇرانىسقا يە، ونداعى كەيىپكەرلەردىڭ تاعدىرى قالىڭ بۇقارانى قاشان دا قىزىقتىرادى. ماسەلەن، كۇنى كەشە «قىز جىبەك» فيلمىندەگى باستى رولدەگى كەيىپكەر، سۇلۋلىقتىڭ سيمۆولىنا اينالعان قىز جىبەكتىڭ ساۋكەلەسى كىمنىڭ قولىنان شىققانى بەلگىلى بولدى.

قالىڭدىقتىڭ باس كيىمىن ساۋلەتشى لەيلا راحىمجانوۆا جاساعان. بۇل تۋرالى ول ءوزىنىڭ Facebook جەلىسىندەگى پاراقشاسىندا جازدى.

«گۇلفايرۋس ىسمايىلوۆانىڭ ەسكيزىن نەگىزگە الا وتىرىپ، قىز جىبەكتىڭ ساۋكەلەسىن مەن تىگىپ شىققان ەدىم. ساۋكەلەنى شۇعىل دايىنداۋ كەرەك بولدى، ءبىراق كينوستۋديا تىگىنشىلەرى بەلگىسىز سەبەپتەرمەن ودان باس تارتتى. سوسىن مەن دايىن ءپىشىندى ۇيگە الىپ، ءاربىر مونشاقتى قاتتى كارتونعا قاداپ تىگە باستادىم. ءتۇنى بويى ەڭبەكتەنىم، ساۋكەلەنى تاڭمەن كينوستۋدياعا دايىن كۇيىندە اپاردىم. جۇزدەگەن مونشاق تىزبەكتەلىپ تىگىلگەن جۇمىستى كورىپ گۇلفايرۋس ىسمايىلوۆا قاتتى تاڭعالدى»، - دەيدى جازباسىندا لەيلا راحىمجانوۆا.

لەيلا راحىمجانوۆا 1949 -جىلى 26 قاڭتاردا الماتى قالاسىندا تۋعان. جاس شاعىندا بيگە اۋەستىگى مەن ارتىستىك قابىلەتى ارقاسىندا «قازاقفيلم» كينوستۋدياسىنىڭ بىرنەشە كارتيناسىنا تۇسكەن. الايدا كەيىن تاڭداۋى باسقا ماماندىققا ءتۇسىپ، تاعدىرى ونى ساۋلەت ونەرىنە اكەلدى. لەيلا شايمەردەن قىزىنىڭ ايتۋىنشا، ساۋكەلەنى 18 جاسىندا تىككەن.

24.kz