ۋكراينا جانە رەسەي تۇتقىندارمەن الماستى
نۇر-سۇلتان. قازاقپارات – 7- قىركۇيەكتە ۋكراينا مەن رەسەي ءوزارا تۇتقىندارمەن الماستى. ەكى ەل ءبىر-بىرىنە 35 ازاماتىن ءبىر مەزگىلدە تاپسىردى.
بوريسپول اۋەجايىندا تۇتقىنداردى ۋكراينا پرەزيدەنتى ۆلاديمير زەلەنسكي جانە قاراپايىم ازاماتتار قۋانا قارسى الدى. ۋكرايناعا ورالعانداردىڭ اراسىندا رەجيسسەر ولەگ سەنتسوۆ جانە وتكەن جىلدىڭ اياعىندا كەرچ بۇعازىندا رەسەيلىك اسكەريلەر ۇستاعان 24 ۋكراين تەڭىزشىسى بولدى.
ساراپشىلاردىڭ پىكىرىنشە، بۇل وقيعا ۋكراينانىڭ ۇكىمەت كۇشتەرى مەن ەلدىڭ شىعىسىنداعى رەسەي قولدايتىن سەپاراتيستەر اراسىنداعى بەس جىلعا سوزىلعان سوعىستى توقتاتۋ بويىنشا جاڭا كەلىسسوزدەر وتكىزۋگە جول اشۋى مۇمكىن.
تۇتقىنداردى قارسى العان زەلەنسكي بۇل قاقتىعىستى توقتاتۋعا اپاراتىن «العاشقى قادام» دەدى.
رەسەيدىڭ سىرتقى ىستەر مينيسترلىگىنىڭ رەسمي وكىلى ماريا زاحاروۆا «ارانداتۋ ارەكەتتەرى» مەن كەيبىر قيىندىقتارعا قاراماستان ەكى ەل تۇتقىندارمەن الماستى دەپ مالىمدەدى.
«بۇل وتە ماڭىزدى قادام. ماسەلەنى ۋشىقتىرماي شەشەتىن وسىنداي قادامداردى بارىنشا قولداۋ كەرەك. ساياسي ەرىك-جىگەر جانە جۇيەلى تۇردە جۇمىس ىستەۋ ءوز جەمىسىن بەرەدى» دەدى ماريا زاحاروۆا.
ەكى ەل الماسۋعا كەلىسكەن تۇتقىنداردىڭ سانى مەن اتى-جوندەرى كوپكە دەيىن بەلگىلى بولعان جوق. رەسەي تۇرمەلەرىندە بەس جىل وتىرعان ولەگ سەنتسوۆ ۋكرايناعا ورالعان سوڭ «ءبىزدىڭ بوستاندىعىمىز ءۇشىن كۇرەسكەن ازاماتتاردىڭ بارلىعىنا العىس ايتامىن» دەدى.
ۋكراينا مەن رەسەيدىڭ تۇتقىندارمەن الماسا باستاعانى 7- قىركۇيەك تاڭەرتەڭ بەلگىلى بولدى. ەكى ەل بيلىگى اراسىنداعى كەلىسسوز بىرنەشە ايعا سوزىلدى. بۇل - تۇتقىندار الماسۋ بويىنشا 2017-جىلدان بەرگى ەڭ ءىرى وقيعا.
«ازاتتىق»
