جاس ۇرپاققا اتقا ءمىنۋ مادەنيەتى دارىپتەلدى

تەرەڭوزەك. قازاقپارات - قىزىلوردا وبلىسى سىرداريا اۋدانىنىڭ ورتالىعى - تەرەڭوزەك كەنتىندە «اتقا ءمىنۋ مادەنيەتى» اتتى تاعىلىمدى شارا وتكىزىلدى، دەپ حابارلايدى قازاقپارات ءتىلشىسى.

مادەني شارا تۇڭعىش پرەزيدەنت - ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» جانە «ۇلى دالانىڭ جەتى قىرى» باعدارلامالىق ماقالالارى اياسىندا ۇيىمداستىرىلدى.

ۇلتتىق ونەردى ۇلىقتاعان شارا اۋداندىق ارداگەرلەر كەڭەسى جانە «سىرداريا اۋدانى ايەلدەرى» قوعامدىق بىرلەستىكتەرىنىڭ قولداۋىمەن اۋدان ورتالىعىنداعى مادەني-دەمالىس پاركىندە وتكىزىلدى. اتالمىش شارا بارىسىندا ات ابزەلدەرىنەن كورمە ۇيىمداستىرىلدى. كورمەدە جاس ۇرپاققا وبلىسقا بەلگىلى اتبەگى قوجابەك جاپپاسبايەۆ تاعىلىمدى اڭگىمە ايتتى.

ول ءار جىلداردا سايگۇلىك جاراتقاندا تۇتىنعان ابزەلدەرى جايىندا سىر شەرتتى. سونداي-اق، اۋدانعا تانىمال ۇستا ءسايدىلدا ءسادۋاقاسوۆ شاباندوزدار ءۇشىن سوققان مۇلىكتەرى تۋرالى وي قوزعاسا، جەرگىلىكتى قولونەرشى سالتانات مامىتايەۆانىڭ جاساعان ابزەلدەرى كورمەگە قويىلدى. رۋحاني جاڭعىرۋعا ارنالعان ىزگى شارانى اۋداندىق ارداگەرلەر كەڭەسىنىڭ ءتوراعاسى ح. ابەن ۇلى اشىپ، اتقا ءمىنۋ مادەنيەتىنىڭ قىر-سىرىنا توقتالدى.

كورمەگە قويىلعان قۇراندى ەردىڭ ءتۇر-ءتۇرى، ومىلدىرىك، قۇيىسقان، اتتىڭ موينىنا تاعاتىن القا تاعى باسقالار كوز جاۋىن الادى. بەلگىلى اتبەگى قوجابەك جاپپاسبايەۆ كوللەكتسياسىندا XVIII عاسىردا جاسالعان انتيكۆاريات سانالاتىن ەر دە بار. ق. جاپپاسبايەۆ باپتاعان اتتار تالاي ءدۇلدىلدى جارىستا باس بايگەنى جەڭىپ الدى. ايماققا تانىمال اتبەگى ءوزى تۇتىنعان ابزەلدەردى كوزدىڭ قاراشىعىنداي ساقتاپ، وسى كۇنگە جەتكىزگەن.

ەستەرىڭىزگە سالا كەتەلىك، بۇدان بۇرىن قىزىلوردالىق وقۋشىلار قورقىت اتا كەشەنىنە بارعانىن حابارلاعان ەدىك.