ەلوردادا كۇرەستەن الەم چەمپيوناتىنىڭ مەدالدارى تانىستىرىلدى

نۇر-سۇلتان. قازاقپارات - نۇر- سۇلتاندا گرەك- ريم، ەركىن جانە ايەلدەر كۇرەسىنەن الەم چەمپيونىنىڭ ۇيىمداستىرۋشىلارى الەم بىرىنشىلىگىنىڭ جۇلدەگەرلەرىنە تابىستالاتىن مەدالدىڭ ديزاينىن تانىستىردى، دەپ حابارلايدى ەلوردا اكىمدىگىنىڭ رەسمي سايتى.

چەمپيوناتتىڭ ۇيىمداستىرۋشىلارى دوڭگەلەك پىشىندەس قالىپتى ديزايننان باس تارتىپ، مەدالدىڭ ءۇش بۇرىشتى ءتۇرىن تاڭداعان. بۇل فورما كۇرەستىڭ ءۇش تۇرىنەن بىرىككەن كۇرەس الەمى (United World Wrestling) اياسىندا وتەتىن الەم چەمپيوناتىنىڭ بىرلىگى مەن تۇراقتىلىعىن سۋرەتتەيدى. ۇيىمداستىرۋ كوميتەتىنىڭ ءتوراعاسى ەرلان قوجاسبايدىڭ ايتۋىنشا، مەدالدىڭ بەتىندە بىرىنشىلىكتىڭ لوگوتيپى مەن استانامىزدىڭ سيمۆولى - «بايتەرەك» سالىنعان. ال لوگوتيپتى تولىقتىرىپ تۇرعان دوعال سىزىقتار كۇرەس ءادىسىن سيپاتتايدى. ال مەدالدىڭ ەكىنشى بەتىندە كۇرەستەن الەم چەمپيوناتىنىڭ سيمۆولى - قار بارىسى بەينەلەنگەن.

ەستەرىڭىزگە سالا كەتەيىك، 2019-جىلدىڭ 14-22- قىركۇيەك ارالىعىندا قازاقستان استاناسى گرەك-ريم، ەركىن جانە ايەلدەر كۇرەسىنەن الەم چەمپيوناتىن قابىلدايدى. بۇل ءدۇبىرلى دودادا توكيو وليمپياداسىنا ىرىكتەۋ باستالادى.

«بارىس ارەنادا» وتەتىن جارىستا وليمپيادا ليتسەنزياسى ءۇشىن الەمنىڭ 100 ەلىنەن 1002 بالۋان تالاسقا تۇسەدى.