باۋىرجان بايبەك ءدۇبىرلى الامان ايتىس وتەتىنىن جاريالادى
بۇل تۋرالى ول ءوزىنىڭ Instagram پاراقشاسىندا جازدى، دەپ حابارلايدى قازاقپارات ءتىلشىسى.
«ايتىسسۇيەر قاۋىمعا جاريالار ءسۇيىنشى حابارىمىز بار. تاياۋ كۇندەردە «Nur Otan» پارتياسىنىڭ قولداۋىمەن التاي مەن اتىراۋ، الاتاۋ مەن ارقا اراسىن ءدۇبىرلى دۋمانعا بولەيتىن ايتىس الامانى باستالادى. بۇل - ايتىس دەسە ارقاسى قوزىپ، رۋحى اسقاقتايتىن قازاق ءۇشىن ورنى بولەك مەرەكە. سوندىقتان، تاۋەلسىزدىكتىڭ العاشقى ساتىنەن- اق ەلباسى ۇلتىمىزدىڭ ۇلى مۇراسىن، وزىق داستۇرلەرى مەن مادەني قازىناسىن تۇگەندەۋگە، ولاردى زامانعا ساي تۇلەتىپ، جاڭعىرتۋعا ەرەكشە دەن قويدى. حالىق ونەرىنىڭ وركەندەۋىنە جاعداي جاساپ، دارىندى جاندارعا جول اشتى. ەلباسىنىڭ تىكەلەي باستاماسىمەن ىسكە اسىرىلعان «مادەني مۇرا» جوباسىندا، «بولاشاققا باعدار: رۋحاني جاڭعىرۋ» ، «ۇلى دالانىڭ جەتى قىرى» باعدارلامالىق ماقالالارىندا دا ۇلتتىق رۋحاني مۇرامىزدى، قۇندى جادىگەرلەرىمىزدى، سپورتتىق ويىندارىمىز بەن ونەر سايىستارىن تۇگەندەپ، دامىتۋعا ەرەكشە ءمان بەرىلگەن. ەلباسى نەگىزىن قالاپ، كوشباسشىلىق جاساپ كەلە جاتقان «Nur Otan» پارتياسىنىڭ دوكتريناسىندا دا قامتىلعان باستى قۇندىلىقتارىمىزدىڭ ءبىرى - وتباسى مەن ءداستۇر. وندا «قازاق ءتىلىن، مادەنيەت پەن ءداستۇردى دامىتۋ - ءبىزدىڭ ستراتەگيالىق باسىمدىعىمىز» ەكەنى ناقتى كورسەتىلگەن» ، - دەپ جازدى باۋىرجان بايبەك.
حابارلانىپ وتىرعانداي، «Nur Otan» پارتياسى جىرشى- تەرمەشىلەرگە، ايتىس ونەرى مەن ۇلتتىق سپورت تۇرلەرىنە ۇدايى قامقورلىق جاساپ كەلەدى.
«ەجەلدەن «باس كەسپەك بولسا دا، ءتىل كەسپەك جوق» دەپ، حان الدىندا دات ايتىپ، ەركىن ويعا ەرىك بەرگەن، بارشاعا بىردەي تەڭدىك بەرگەن ەلمىز. سوندىقتان ۇلتىمىزدىڭ وسىنداي وزىق ونەرىن، ىزگى داستۇرلەرىن جالعاستىرۋ ءبىزدى كەمەلدەندىرە تۇسەدى. وسىعان وراي پارتيا ءتوراعاسىنىڭ باستاماسىمەن قايتا جاڭعىرۋعا كىرىسىپ، ەكىنشى تىنىسى اشىلىپ وتىرعان ساياسي ۇيىمىمىز ايتىسقا ايرىقشا نازار اۋدارىپ وتىر. وسى ماقساتتا ءبىز پارتيا قولداۋىمەن جىل بويى جەر- جەردە الامان ايتىستار ۇيىمداستىرۋدى قولعا الدىق. بيىلدىڭ وزىندە جىل سوڭىنا دەيىن بەس ايتىس وتكىزەمىز. بارشاڭىزدى الدا وتەتىن وسىناۋ ارقالى اقىنداردىڭ ءسوز سايىسىنا كەلىپ، ورەلى ونەرىمىزدى تاماشالاۋعا شاقىرامىن» ، - دەپ جازدى باۋىرجان بايبەك.
