اقىن سەرىكزات دۇيسەنعازىنىڭ وتباسى «مەرەيلى وتباسى» بايقاۋىنىڭ فينالىنا ءوتتى
التى جىلدا اتالمىش كونكۋرسقا 15197 وتباسى قاتىسىپتى. ونىڭ 62 پايىزىن - اۋىل جانۇيالارى، 3 پايىزىن - كوپبالالى وتباسىلار، 18 پايىزىن - جاس وشاقتار، 17 پايىزىن - ەڭبەك ديناستيالارى قۇراعان. كونكۋرسقا قاتىسۋشىلاردىڭ سانى جىل وتكەن سايىن وسۋدە.
ق ر مادەنيەت جانە سپورت ۆيتسە- ءمينيسترى ەلدوس رامازانوۆ بيىل قاتىساتىن 17 وتباسىنىڭ ءارقايسى ەرەكشە ەكەنىن ايتتى.
«وڭىرلىك كونكۋرستاردان ۇزدىك شىققان وتباسىلاردىڭ جارتىسىنان استامى - كوپبالالى. مىسالى، استانامىزدىڭ نامىسىن اقىندار وتباسى قورعايدى. وتاعاسى سەرىكزات دۇيسەنعازى بەسىنشى اتادان جالعاسقان اقىندىق جولدى ۇستانعان. بەلگىلى قالامگەر سەرعازى راحىموۆ پەن «ءسابي بولعىم كەلەدى» ءانىنىڭ سازىن جازعان تۇرسىنعازى راحىموۆ دۇيسەنعازيندەر اۋلەتىنە تۋىس بولىپ كەلەدى. سەرىكزات اقىن جۇبايىمەن بىرگە 3 بالا تاربيەلەپ وتىر» ، - دەيدى مينيسترلىك وكىلى.
ق ر جاستار جانە وتباسى ىستەرى كوميتەتىنىڭ ءتوراعاسى ماديار قوجاحمەت «مەرەيلى وتباسى» كونكۋرسىنىڭ وتباسىلىق قۇندىلىقتار قۇلدىراپ تۇرعان زاماندا ماڭىزى زور ەكەنىن ايتادى.
«جىل باسىنان بەرى 59555 نەكە قيىلسا، 29025 اجىراسۋ فاكتىسى تىركەلگەن. اجىراسۋعا مىنەزدىڭ سايكەس كەلمەۋى، باسپانا قيىندىعى، زورلىق- زومبىلىق، ماسكۇنەمدىك پەن ويىنقۇمارلىق سەبەپ بولۋدا. بۇل تەندەنتسيانىڭ بەتىن قايتارۋ ءۇشىن 9 وڭىردە وتباسىن قولداۋ ورتالىعى اشىلدى» ، - دەيدى ول.
ال ق ر پرەزيدەنتى جانىنداعى ايەلدەر ىستەرى جانە وتباسى- دەموگرافيالىق ساياسات جونىندەگى ۇلتتىق كوميسسيا ءتوراعاسىنىڭ ورىنباسارى ءلاززات سۇلەيمەن كونكۋرس التى جىلدىڭ ىشىندە بيىك بەدەلگە يە بولعانىن ايتادى.
«بيىلعى قاتىسۋشىلاردىڭ 80 پايىزى - كوپبالالى ءارى ونەگەلى وتباسىلار. «وتان وتباسىنان باستالادى» دەگەن قاناتتى ءسوز بار. مەملەكەت باسشىسى قاسىم- جومارت توقايەۆتىڭ قازاقستان حالقىنا جولداۋىندا وتباسى جانە بالا ينستيتۋتىن قولداپ، ينكليۋزيۆتى قوعام قۇرۋدى باسىم باعىت رەتىندە اتادى. سونىمەن قاتار، پرەزيدەنت ەڭ الدىمەن كوپبالالى جانە از قامتىلعان وتباسىلار ءۇشىن وتباسىلىق بيزنەس اشۋ ماسەلەسى بويىنشا ۇكىمەتكە ناقتى تاپسىرمالار بەردى. وسىنىڭ ءبارى مەملەكەت باسشىسىنىڭ وتباسى ينستيتۋتىنا دەگەن قامقورلىعى» ، - دەدى ول.
ەرتەڭ - كونكۋرس ۇمىتكەرلەرىنە داۋىس بەرۋدىڭ سوڭعى كۇنى. ال ونىڭ قورىتىندىسى 7 - قىركۇيەك كۇنى جاريالانباق.
