ۇلتتىق كەڭەستە بۇقارانىڭ كوكەيىندە جۇرگەن ماسەلەلەر كوتەرىلدى - بەكبولات تىلەۋحان

نۇر- سۇلتان. قازاقپارات - ۇلتتىق قوعامدىق سەنىم كەڭەسىنىڭ ءبىرىنشى وتىرىسىندا حالىقتىڭ كوكەيىندە جۇرگەن ماسەلەلەر كوتەرىلدى. 

بۇل تۋرالى ق ر پارلامەنتى ءماجىلىسىنىڭ دەپۋتاتى بەكبولات تىلەۋحان ايتتى، دەپ حابارلايدى قازاقپارات ءتىلشىسى.

«مەملەكەت باسشىسىنىڭ الدىندا تولعاقتى، ەلدىڭ، بۇقارانىڭ كوكەيىندە جۇرگەن نارسەلەردىڭ ءبارىن ايتۋعا مۇمكىندىكتىڭ بولۋى - بۇل شىندىعىندا ەل تاريحىنداعى دەموكراتيالىق قادام دەپ ەسەپتەيمىز. جالپى ايتىلماي قالعانى جوق. جاڭاعى جەردە ەشكىم ەشكىمنىڭ اۋىزىنا قاقپاق بولعان جوق. سوسىن الەۋمەتتىك ءارتۇرلى توپتا ءوزىنىڭ ويىمەن ەرەكشەلەنىپ جۇرگەن ازاماتتاردىڭ بارلىعىنىڭ وسى جەردە ءسوز الۋى كەڭەستىڭ بەدەلىن ەرەكشەلەيتىن دۇنيە بولدى دەپ ويلايمىن» ، - دەدى بەكبولات تىلەۋحان كەڭەس وتىرىسىنان كەيىن ب ا ق وكىلدەرىنە بەرگەن سۇحباتىندا.