مەملەكەت باسشىسى: قازاقستاندا ساياسي رەفورمالار قاجەتتىلىگى ءپىسىپ-جەتىلدى
بۇل تۋرالى بۇگىن ۇلتتىق قوعامدىق سەنىم كەڭەسىنىڭ العاشقى وتىرىسىندا قازاقستان پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«ازاماتتىق بەلسەندىلىك ەل تاعدىرىنا دەگەن جاۋاپكەرشىلىك، تۇرمىس ساپاسىن جاقسارتۋعا دەگەن ۇمتىلىس حالقىمىزدى العا جەتەلەيدى. وسى ۇستانىمداردى باسشىلىققا الىپ، ەلىمىزدىڭ دامۋىنا تىڭ سەرپىن بەرۋ ماڭىزدى مىندەت. كەز كەلگەن مەملەكەتتىڭ ءوز تۇيتكىلى بولادى. العا ىلگەرىلەۋ ءۇشىن قوردالانعان ماسەلەلەردى ۋاقىتىلى شەشۋ كەرەك»، - دەدى ق ر پرەزيدەنتى.
مەملەكەت باسشىسى قازىرگى ساياسي-الەۋمەتتىك، ەكونوميكالىق جانە قوعامدىق دامۋدىڭ سيپاتى ايتارلىقتاي وزگەرەتىنىن ايتتى.
«بيىلعى سايلاۋ ناۋقانى سونى انىق كورسەتتى. ەل ومىرىندە بولىپ جاتقان ماڭىزدى وزگەرىستەرگە قۇبىلمالى الەمنىڭ دە ىقپالى زور ەكەندىگىن ءتۇسىنۋىمىز قاجەت. دەگەنمەن، ۇلتتىق كەڭەس جۇمىسىنىڭ باستاۋىندا الداعى جۇمىستىڭ وتە ماڭىزدى ءارى تۇبەگەيلى ساتتەرىن بەلگىلەپ بەرسەم. ءبىزدىڭ كۇش-جىگەرىمىز دامۋعا باعىتتالعان بولۋى ءتيىس. مەن بارلىق ۋاقىتتا شەكتەۋلى بولۋعا قارسى بولىپ كەلەمىن. سەبەبى ول تانىمالدىق اكەلۋى مۇمكىن. ءبىراق ەش ناتيجە بەرمەيدى. ال بىزگە جەمىستى جۇمىس قاشاندا كەرەك. سوندىقتان ءوزىمنىڭ قازاقستان حالقىنا جولداۋىمدا ساياسي رەفورمالاردى الدىعا ەنتەلەمەستەن، ويلاستىرىپ، بىرتىندەپ جۇزەگە اسىراتىندىعىمىزدى باسا اتاپ وتكەن ەدىم. تاريحي دامۋدىڭ لوگيكاسى وسىنداي. دەگەنمەن، ۋاقىت تالابىنان قالىپ قويماۋ كەرەك. ياعني، رەفورما رەفورما ءۇشىن ەمەس، قاجەتتىلىك ءۇشىن. رەفورمالاردىڭ قاجەتتىلىگى ءپىسىپ-جەتىلدى، ول بارلىعىنا دا تۇسىنىكتى»، - دەدى قاسىم-جومارت توقايەۆ.
اۆتور: مارلان جيەمباي
