پرەزيدەنت: بيلىك تىزگىنىن قابىلدايتىن جاس ماماندار رەزەرۆىن دايىنداپ جاتىرمىز

نۇر-سۇلتان. قازاقپارات - ەل باسقارۋ تىزگىنىن قولىنا الاتىن جاستاردىڭ كادرلىق رەزەرۆى قۇرىلىپ جاتىر.

بۇل تۋرالى ق ر پرەزيدەنتى قاسىم-جومارت توقايەۆ ۇلتتىق قوعامدىق سەنىم كەڭەسىنىڭ العاشقى وتىرىسىندا ايتتى.

«تەحنولوگيالار وزگەرىپ، ەكونوميكا، الەۋمەتتىك ءتارتىپ وزگەرىپ جاتىر. ەڭ باستىسى ادامزاتتىڭ ءومىر سالتى تۋرالى تۇسىنىگى وزگەرىپ جاتىر. جاستاردىڭ الەم تۋرالى كوزقاراسى قارقىندى ترانسفورماتسيالانىپ جاتىر. جاستار الەمدىك ءىرى تەحنولوگيالىق جانە ساياسي وزگەرىستەر داۋىرىندە ءوز ورنىن بەلسەندى ىزدەۋدە. ارينە، جاستار بىركەلكى ەمەس. قازاقستان بۇل جاعدايدا سىرت قالمايدى. بىرەۋ عىلىم مەن ونەرگە، بيزنەسكە ۇمتىلادى. بىرەۋگە مەملەكەتتىك قىزمەت نەمەسە قوعامدىق بەلسەندىلىك ۇنايدى. الايدا ەشتەڭە ىستەگىسى كەلمەيتىن، تولاسسىز ويىن- كۇلكى مەن تۇنگى كلۋبتان باسقانى قالامايتىندار دا بار. وسىلاي بولعان، بار جانە بولا دا بەرەدى. وسى ەلدىڭ پرەزيدەنتى رەتىندەگى تىلەگىم - ماقساتى ايقىن، بەلسەندى جاستارعا مىناۋ كۇردەلى ومىردە ءوز ورنىن تاۋىپ، قالىپتاسۋىنا مۇمكىندىك بەرۋ. سوندىقتان، ءبىز بيزنەسپەن اينالىسۋعا مۇمكىندىك تۋعىزىپ، قابىلەتتى جانە از قامتىلعان وتباسىدان شىققان بالالارعا ءبىلىم الۋ ءۇشىن گرانتتار بولەمىز. تالانتتى بالالاردى ىزدەپ، جاس باسقارۋشىلاردىڭ كادرلىق رەزەرۆىن قۇرىپ جاتىرمىز. كەيىن مەملەكەتتى باسقارۋ تىزگىنىن سولارعا وتكىزەمىز»، - دەدى مەملەكەت باسشىسى.

اۆتور: ەسىمجان ناقتىباي