قازاقستان جۇلدىزدارى ەرجان ماكسيمدى تۋعان كۇنىمەن قۇتتىقتادى

نۇر-سۇلتان. قازاقپارات - قازاقستان ەستراداسىنىڭ جۇلدىزدارى جاس ءانشى ەرجان ماكسيمدى تۋعان كۇنىمەن قۇتتىقتاپ، وعان ماسكەۋگە ساپارىندا ساتتىلىك تىلەدى، دەپ حابارلايدى قازاقپارات.

ە. ماكسيم Instagram-داعى ءوز پاراقشاسىندا ۆيدەو جاريالادى. وندا ءانشى ءمادينا ءسادۋاقاسوۆا، مارجان اراپبايەۆا، انەل ارىنوۆا جانە اكتريسا اينۇر ءىلياسوۆالار جاس تالانتتى تۋعان كۇنىمەن قۇتتىقتاپ، ءان دە شىرقاپ بەردى.

«بۇگىن قازاقتىڭ كىشكەنتاي ماقتانىشىنىڭ تۋعان كۇنى. سەنى شىن جۇرەكتەن قۇتتىقتايمىز، باقىتتى بول! ماسكەۋگە كەتىپ بارا جاتىر ەكەنسىڭ. سوندا تۇرىپ، يگور كرۋتويدىڭ ستۋدياسىندا ءبىلىم الاسىڭ، تاجىريبە جيناقتايسىڭ. ءبىز سەنى جاقسى كورەمىز، ساعان سەنەمىز!»، - دەدى م. ءسادۋاقاسوۆا.

 سونداي- اق بەلگىلى بولعانداي، ە. ماكسيم اتىراۋدا قازاقستان مۇنايىنىڭ 120 جىلدىعىنا ارنالعان كونسەرتتىك شارادا ونەر كورسەتتى. ول جەلىدەگى پاراقشاسىنا پرەزيدەنت قاسىم-جومارت توقايەۆپەن جانە تانىمال ساحنا قايراتكەرلەرىمەن تۇسكەن فوتونى جۇكتەگەن. ەسكە سالساق، 5 -قىركۇيەك كۇنى مەملەكەت باسشىسى ماڭعىستاۋ وبلىسىنا جۇمىس ساپارىمەن بارعان بولاتىن.

بۇعان دەيىن حابارلاعانىمىزداي، رەسەيلىك «گولوس. دەتي» بايقاۋىنىڭ جەڭىمپازى بولعان قازاقستاندىق جاس دارىن ر ف حالىق ءارتىسى، كومپوزيتور يگور كرۋتويدىڭ اكادەمياسىندا ءبىلىم الۋ ءۇشىن وتباسىمەن ماسكەۋگە كوشكەلى جاتىر.

بۇدان بولەك، ول 30 -تامىزدا سوچيدەگى «Super دەتي» حالىقارالىق بالالار فەستيۆالىنە قۇرمەتتى قوناق رەتىندە قاتىسادى. ال بيىلعى 24 -قاراشادا پولشانىڭ گليۆيتسە قالاسىندا وتەتىن «Junior Eurovision 2019» حالىقارالىق ءان بايقاۋىندا قازاقستان نامىسىن قورعايتىن بولادى.

ەرجان ماكسيم 2007 -جىلى 6 -قىركۇيەكتە ورال قالاسىندا دۇنيەگە كەلگەن.

اۋدارما: ميرا تولەندى قىزى