قابدەش ءجۇمادىلوۆ: ازيا ەلدەرى ءبىر- بىرىنە ادەبيەتىن ناسيحاتتاۋى كەرەك
«1973 -جىلى الماتىدا ازيا- افريكا ەلدەرى اقىن- جازۋشىلارىنىڭ كونفەرەنتسياسى ءوتتى. جاس كەزىمىز ەدى. ءارقايسىمىزدى ءبىر- ءبىر ەلدىڭ دەلەگاتسياسىن كۇتىپ الۋعا مىندەتتەپ قويعان. مەن كەندزابۋرو وە باستاعان جاپون جازۋشىلارىن كۇتىپ الدىم. ەلگە اتتانعانشا باسى- قاسىندا بولدىم. ول ءانۋار ءالىمجانوۆتىڭ باسشىلىعىندا جاسالعان شارا ەدى. ال ەندى بۇل فورۋم 46 جىلدان كەيىن وتكىزىلىپ وتىر. وتە كەرەك. جازۋشىلار وداعىنىڭ جاڭا باسشىلىعى باستاما كوتەرىپ، ۇكىمەت قولداپ، ازيا جازۋشىلارىن جينادى. بۇل وتە ماڭىزدى جيىن. باس قوسۋ كەرەك. تاجىريبە الماسۋ كەرەك» ، - دەدى قابدەش ءجۇمادىلوۆ فورۋم كەزىندە تىلشىلەردىڭ سۇراعىنا جاۋاپ بەرە وتىرىپ.
جازۋشىنىڭ ايتۋىنشا، ازيا ەلدەرىنىڭ اقىن- جازۋشىلارى ءبىر- بىرىنە ءتول ادەبيەتتەرىن ناسيحاتتاۋى ءتيىس.
«ءبىر- ءبىرىمىزدى ناسيحاتتاۋىمىز كەرەك. مىسالى، قازاق ادەبيەتى ناسيحات جاعىنان كەنجە. اۋدارىلۋ جاعىنان دا سول. يمپەريا تۇسىندا بەس- التى عانا نومەنكلاتۋرالىق جازۋشىلار اۋداراتىن. باسقالارعا شەك قويىلدى. ەندى ءقازىر تاۋەلسىزدىكتەن كەيىن قۇدايعا شۇكىر، بۇكىل ازيا جازۋشىلارىن جيناپ، باسىن قوسىپ جاتىرمىز. ولاردى ءبىز ناسيحاتتاۋىمىز كەرەك. قازاق ادەبيەتىن ولار ناسيحاتتاۋى كەرەك. بۇگىنگى فورۋمنىڭ بىزگە بەرەرى وسى عوي دەيمىن» ، - دەدى قابدەش ءجۇمادىلوۆ.
ەسكە سالساق، ەلوردادا ازيا قالامگەرلەرىنىڭ I فورۋمى ءوتىپ جاتىر. وعان ادەبيەت بويىنشا نوبەل سىيلىعىنىڭ 3 نومينانتى قاتىسۋدا.
فورۋم بارىسىندا پرەزيدەنت قاسىم- جومارت توقايەۆ ازيا الىبى ادەبي سىيلىعىن تاعايىنداۋدى ۇسىندى.
