مەملەكەت باسشىسى ازيا حالىقتارىنىڭ وركەنيەتتەر قاقتىعىسىنا ۇشىراماۋ سىرىن ايتتى
بۇل تۋرالى بۇگىن ەلوردادا ءوتىپ جاتقان ازيا ەلدەرى قالامگەرلەرىنىڭ تۇڭعىش فورۋمىندا قازاقستان پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«ۇلى دالامىز سان الۋان وركەنيەتتەر مەن مادەنيەتتەردىڭ كۋاسى. ەلىمىز الىپ قۇرلىقتىڭ باتىسى مەن شىعىسىن، كۇنگەيى مەن تەرىسكەيىن جالعاعان توعىز جولدىڭ تورابىندا ورنالاسقان. ءبىز ءبىر كەزدەرى ۇلى تۇركى قاعاناتىنان ميراس بولعان تۇركى تەگىمىزدى ساقتاي بىلگەن حالىقپىز. بۇگىنگى تۇركى جۇرتىنىڭ تەڭدەسسىز جەتىستىكتەرى سول داۋىرلەردەن قالىپتاسقان ۇلى مۇرالارمەن تىعىز بايلانىستى»، - دەدى قازاقستان پرەزيدەنتى.
مەملەكەت باسشىسى ازيا ۇلى وركەنيەتتەردىڭ دۇنيەگە كەلۋىنە، وركەن جايۋىنا، كەيىن تاريح قاتپارىنا ءسىڭىپ، قالىپتاسۋىنا كۋا بولعان كونە قۇرلىق ەكەندىگىن باسا ايتتى.
«اراب، پارسى، قىتاي، ءۇندى وركەنيەتتەرى ادامزات تاريحىنىڭ اجىراماس بولىگى. شىعىس مادەنيەتتەرى سان الۋان سيپاتتارىنا قاراماستان، ءوزارا استاسىپ جاتىر. ازيا حالىقتارى وركەنيەتتەر قاقتىعىسىنا ۇشىراماي، ەتەنە ۇندەستىكتە دامۋىنىڭ باستى سىرى دا وسىندا. سوڭعى جارتى عاسىردا ازيا قايتا تۇلەپ، قارقىندى دامىپ كەلەدى. شىعىس مەملەكەتتەرى الەمدىك الپاۋىتتار قاتارىنان نىق ورىن الدى»، - دەدى ق. توقايەۆ.
