حالىقتىڭ ءال-اۋقاتى ارتقاندا ازاماتتىق بەلسەندىلىك تە وسەدى - ساراپشى

نۇر-سۇلتان. قازاقپارات - ەكونوميكالىق دامۋدىڭ تۇراقتىلىعى شاعىن جانە ورتا بيزنەستىڭ دامۋىمەن تىكەلەي بايلانىستى.

بۇل پىكىردى ق ر پرەزيدەنتى جانىنداعى مەملەكەتتىك باسقارۋ اكادەمياسىنىڭ ۆيتسە-رەكتورى ايگۇل كوشەربايەۆا ايتتى، دەپ حابارلايدى قازاقپارات ءتىلشىسى.

«بۇگىندە ازاماتتاردىڭ ءومىر ءسۇرۋ دەڭگەيى مەن ءال-اۋقاتى، ۋربانيزاتسيا جانە اقپاراتقا قولجەتىمدىلىگى ارتۋدا، سايكەسىنشە ازاماتتىق بەلسەندىلىك دەڭگەيى دە ءوسىپ كەلەدى. سوندىقتان، قوعامدىق كەڭەستەر قۇرىلدى، قوعام مەن بيزنەس اراسىندا، بيلىك پەن حالىق اراسىندا دا ۇنەمى بايلانىس بار. الايدا، ءمان بەرۋگە تۇرارلىق ءبىر ماسەلە بار. وقيعاعا ءۇن قاتۋ، جاۋاپ بەرۋدە سىلبىرلىق بار. سوندىقتان، حالىقتىڭ مۇڭ-مۇقتاجىن «ەستيتىن» مەملەكەت ماسەلەسى قويىلىپ وتىر. ياعني، مەملەكەتتە ەكونوميكالىق، الەۋمەتتىك-ساياسي رەفورمالاردى جۇزەگە اسىرۋ پلاتفورماسى بولۋى قاجەت. ەكونوميكالىق دامۋدا تۇراقتىلىق بولۋى كەرەك. ال ونىڭ تۇراقتىلىعى شاعىن جانە ورتا بيزنەستىڭ دامۋىمەن تىكەلەي بايلانىستى»، - دەدى ا. كوشەربايەۆا نۇر-سۇلتان قالاسىنىڭ اكىمدىگىندە پرەزيدەنت جولداۋىن تالقىلاۋ بويىنشا قالا اكتيۆىنىڭ كەزدەسۋىندە.

ونىڭ ايتۋىنشا، قازاقستان قاتارىنا قوسىلعىسى كەلەتىن دامىعان ەلدەردە جالپى ىشكى ونىمدەگى شوب ۇلەسى 50-60 پايىزدى قۇرايدى. 2018-جىلى نۇر-سۇلتان قالاسىنىڭ جالپى وڭىرلىك ونىمىندە شوب 58,5 پايىز بولدى. ياعني، قالا دامىعان ەلدەردىڭ ساناتىنا ەنۋ ءۇشىن قارىشتى قادامدار جاساۋدا. جانە ا. كوشەربايەۆا پرەزيدەنتتىڭ «قاراپايىم زاتتار ەكونوميكاسى» تۋرالى ەسكەرتۋىن ەرەكشە اتاپ ءوتتى.

«جوبانىڭ سانى مەن قۇنىن ايتقاندا، ناتيجەگە باعدار جاساۋ قاجەت. جوبالاردى قولعا العاندا ونداعى مەنەدجەرلەردىڭ ءبىلىم دەڭگەيىن كوتەرۋ كەرەك. قازاقستاندا مەملەكەتتىك باسقارۋ اكادەمياسىندا مەملەكەتتىك جوبالىق مەنەدجەرلەرگە قاتىستى مۇنداي جۇمىستار ءجۇرىپ جاتىر»، - دەدى ايگۇل كوشەربايەۆا.