بۇگىننەن باستاپ «قارلىعاش ۇيا سالعاندا» تەلەحيكاياسىنىڭ ەكىنشى ءبولىمى ەفيرگە شىعادى
وتكەن جىلى كورەرمەننىڭ كوزايىمىنا اينالعان جوبانىڭ اۆتورى، ءارى پروديۋسەرى - گۇلنۇر ماماساريپوۆا. باستى رولدەردى ەركەبۇلان دايىروۆ پەن كامشات جولدىبايەۆا سومدايدى. تۋىندىنىڭ ءبىرىنشى ماۋسىمى - باس كەيىپكەرلەردىڭ كوڭىل جاراستىرىپ، باقىتقا كەنەلۋلەرىمەن اياقتالعانى كوپشىلىك كورەرمەننىڭ ەسىندە. الايدا ەكىنشى ماۋسىمىنىڭ سەناري جەلىسى - ءومىر بۇرالاڭدارى تاقىرىبى توڭىرەگىندە ءوربيدى.
تەلەحيكايادا وتاۋ تىگىپ، وتباسىن قۇرۋعا بەل بۋعان تاسقىن مەن قارلىعاش بۇگىنگى قوعامنىڭ بەت- بەينەسىن قاز قالپىندا كوز الدىڭىزعا الىپ كەلەدى. سەبەبى، بۇگىندە، سەزىم سىرىن سەزىنىپ، ماحابباتپەن باس قوسقان كوپتەگەن جاس ەرلى- زايىپتىلار - ءومىر وتكەلىندەگى ءتۇرلى تارتىسقا تويتارىس بەرە الماي، سەرگەلدەڭگە سالىنىپ جاتقانى جاسىرىن ەمەس. ءدال وسى سىندى بۇگىنگى قوعامنىڭ وزەكتى ماسەلەلەرى - اتالمىش مەلودراماعا ارقاۋ بولادى.
وتباسىلىق ومىرگە ەكىنشى رەت قادام باسار الدىندا تاسقىن - وتكەن ومىرىنە ورالىپ، باقيلىق بولعان جارىنىڭ اتا- اناسىنىڭ الدىنان وتەدى. كوپ ۇزاماي ەكى جاستىڭ ۇيلەنۋ تويلارى دا وتەدى. سول ساتتە تاسقىن دا، قارلىعاش تا، تاسقىننىڭ قىزدارى دا باقىتتى ەدى. ءبىراق، بۇل باقىتتى ءسات - ءارى قاراي ۇزاعىنان جالعاسىن تاپپايدى. بالقىپ- شالقىعان تۇرمىستىق جاعدايدا ءومىر سۇرۋگە ابدەن داعدىلانعان قارلىعاش - تاسقىننىڭ قاراپايىم ۇيىنە كەلىپ، تارشىلىقتىڭ تونىن كيگەندەي كۇي كەشەدى. ءتىپتى جاس جۇبايلار كۇندەلىكتى كۇيبىڭ تىرشىلىكتە ءبىر- بىرىمەن كەلىسە الماي قالاتىن كەلەڭسىزدىكتەرگە ءجيى تاپ بولا باستايدى. ۇيلەنۋ - وڭاي، ءۇي بولۋ - قيىننىڭ كەبىن كيگەن تاسقىننىڭ دا، قارلىعاشتىڭ دا جۇمىستارىندا دا قيىندىقتار باستالادى. تاس پەن تاۋعا باس ۇرارداي بۇل كەزەڭدى باس كەيىپكەرلەر بىرگە وتكەرە الا ما؟ جۇمىسى دەسە قاشان دا جانىن بەرەتىن قارلىعاش - ومىرىندە وتكەنى بار تاسقىنمەن قۇرعان شاڭىراعىن شايقالتۋى مۇمكىن بە؟ ءوزى تاڭداعان تاعدىرىنا مويىنسۇنعان تاسقىن تاڭداۋىنا قارسى تۇرا الادى ما؟
سان ءتۇرلى سەزىمگە بولەيتىن «قارلىعاش ۇيا سالعاندا 2» تەلەحيكاياسى 21.40 تا كورسەتىلەدى.
رومانتيكالىق درامادا باستى رولدەردى كامشات جولدىبايەۆا، ەركەبۇلان دايىروۆتان بولەك، مەرەي ماقاجان، الاۋ قايرات قىزى، ارۋجان قامبار، تىنىشكۇل سۇلتانبەرديەۆا، جولامان ءامىروۆ، ءادينا باجان، اسقار جۇمابەك جانە ت. ب. اكتەرلار سومدايدى.
