18:07, 03 - قىركۇيەك 2019 | GMT +6
چيپسى عانا جەپ ديەتا ۇستاعان جىگىت كورۋ قابىلەتىنەن ايىرىلدى
نۇر- سۇلتان.قازاقپارات - ۇلىبريتانيادا 17 جاستاعى ءجاسوسپىرىم ون جىل بويى تەك قانا چيپسى جەگەن. سونىڭ سالدارىنان كورۋ قابىلەتىن جوعالتىپ، ەستۋ قابىلەتىنەن ايىرىلعان.
ول بالا كۇنىنەن جەمىس- جيدەك پەن كوكونىستى ۇناتپاعان. سول سەبەپتى جەتى جاسىندا بارلىق تاماقتان باس تارتىپ، فاستفۋد قانا جەۋگە كوشكەن.
ول ون جىل بويى فري كارتوبىن، چيپسى، بۋرگەر عانا جەگەن. 15 جاسىندا دەنساۋلىعى سىر بەرە باستاعان. تاعى ەكى جىل وتكەندە ول ەستۋ، كورۋ قابىلەتتەرىن جوعالتقان. دارىگەرلەر سول كەزدە عانا ونىڭ اعزاسىندا كالتسي، دارۋمەندەر مەن مينەرالدار جەتىسپەيتىنىن انىقتاعان.
