باتىس قازاقستاندىق قوس دويبىشى الەم چەمپيونى اتاندى

ورال. قازاقپارات – باتىس قازاقستاندىق قوس دويبىشى بولگاريانىڭ كرانيەۆو قالاسىندا وتكەن الەم چەمپيوناتىندا جەڭىمپاز اتاندى، دەپ حابارلايدى قازاقپارات ءتىلشىسى.

دۇنيەجۇزىلىك دوداعا الەمنىڭ 19 ەلىنەن 200 دەي سپورتشى قاتىسىپ، باق سىنادى.

قازاقستان قۇراماسى ساپىندا ەل نامىسىن قورعاعان انەل داۋلەتوۆا 16 جاسقا دەيىنگىلەر، توعجان تاجىبەكوۆا 13 جاسقا دەيىنگىلەر اراسىندا ۇزدىك شىعىپ، چەمپيون اتاندى.

ولاردىڭ باپكەرلەرى - قازاقستاننىڭ ەڭبەك سىڭىرگەن جاتتىقتىرۋشىسى دانيار قادىر ۇلى جۇماگەلديەۆ پەن ءاليا زاكىرجان قىزى جۇماگەلديەۆا.

د. جۇماگەلديەۆتىڭ ايتۋىنشا، دويبىشىلاردىڭ ەكەۋى دە مۇمكىن بولعان 14 ۇپايدىڭ 13 ىن جينادى.

«شاكىرتتەرىمىز وسىلايشا بۇعان دەيىنگى تابىستارىن ەسەلەي ءتۇستى. انەل داۋلەتوۆا - جاستار اراسىندا (16 جاس) ەكى دۇركىن الەم چەمپيونى، بىرنەشە مارتە قازاقستان، ازيا جەڭىمپازى، IDF سپورت شەبەرى. ال توعجان تاجىبەكوۆا - بىرنەشە مارتە قازاقستان، ەكى دۇركىن ازيا جانە الەم چەمپيونى (13 جاس)، سپورت شەبەرلىگىنە ۇمىتكەر»، دەدى قازاقپارات تىلشىسىنە د. جۇماگەلديەۆ.

دانياردىڭ تاعى ءبىر شاكىرتى ءارى قىزى، وسى بىرىنشىلىكتە حالىقارالىق گروسسمەيستەر اتاعىن العان التىناي جۇماگەلديەۆا 27 جاسقا دەيىنگى جاستار اراسىندا سىنعا ءتۇسىپ، ءۇشىنشى ورىنعا يە بولدى.

ەسكە سالا كەتەيىك، بۇدان بۇرىن دويبىدان جاستار اراسىندا التى دۇركىن الەم چەمپيونى التىناي جۇماگەلديەۆاعا حالىقارالىق گروسسمەيستەر اتاعى بەرىلگەنىن جازعان بولاتىنبىز.

دويبىشىلار ەرتەڭ ورالعا ورالادى.