سىعاناقتى زەرتتەۋگە وزبەك ارحەولوگتارى دا قىزىعۋشىلىق تانىتتى
بۇل ءىس-شارالار تۇڭعىش پرەزيدەنت - ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسى اياسىندا قولعا الىنىپ وتىر.
سىعاناق قالاشىعىن جان-جاقتى زەردەلەۋ شارالارىنا تۇركىستان قالاسىنداعى حالىقارالىق قازاق- تۇرىك ۋنيۆەرسيتەتىنىڭ ارحەولوگيالىق زەرتتەۋ ينستيتۋتى عالىمدارى بەلسەندى تۇردە اتسالىسىپ كەلەدى. ۋنيۆەرسيتەت ارحەولوگتارى 2003 -جىلدان بەرى بۇل باعىتتا كوپتەگەن جۇمىستاردى جۇزەگە اسىردى. بۇگىنگى كۇنگە دەيىن وتكەن كۇندەردىڭ بەلگىسى رەتىندە كوپتەگەن كونە جادىگەرلەر قولعا ءتۇستى. عالىمدار ەسكى كەزەڭنەن سىر شەرتەتىن سان الۋان ءساندى عيماراتتاردىڭ ورنىن تاپتى.
عالىمداردىڭ ايتۋىنشا، بۇل قالاشىق ورنىنان قۇمىرا، اقشا، سىرعا، جۇزىك جانە سۇيەكتەن جاسالعان بۇيىمدار شىققان. سونداي-اق، مۇندا تۇرعان ادامدار ويناعان اسىقتار دا قولعا ءىلىندى. ءبىر ورىننان 30-40 اسىق تابىلدى. سونىمەن قاتار، قازبا جۇمىستارى بارىسىندا سىعاناقتىڭ ورنالاسۋ جاعدايى دا انىقتالىپ جاتىر. ناتيجەسىندە عالىمدار كونە شاھاردىڭ شىعىس قاقپاسىنىڭ ورنىن انىقتادى.
«سىعاناق قالاشىعى UNESCO- نىڭ دۇنيەجۇزىلىك مۇرالارىنىڭ الدىنا الا تىزىمىنە ەنگىزىلگەنى بەلگىلى. بۇگىندە كونە قالاشىقتى تۋريزم ورنىنا اينالدىرۋ باعىتىندا ناتيجەلى جۇمىستار اتقارىلىپ كەلەدى. سىعاناقتىڭ اۋماعى قورشالدى، مۇنارالى قاقپاسى مەن قورعان قابىرعالارىنىڭ ءبىرقاتار بولىگى 3 مەتر بيىكتىككە دەيىن قالپىنا كەلتىرىلدى. وسىنىڭ ناتيجەسىندە شامامەن X عاسىردان باستاپ تاريحتان بەلگىلى قالا اشىق اسپان استىنداعى مۇراجايعا انيالدى. بيىل ءبىزدىڭ زەرتتەۋ جۇمىستارىمىزعا وزبەك ارىپتەستەرىمىز دە اتسالىسىپ وتىر»، - دەدى تۇركىستان قالاسىنداعى حالىقارالىق قازاق- تۇرىك ۋنيۆەرسيتەتىنىڭ ارحەولوگيالىق زەرتتەۋ ينستيتۋتىنىڭ اعا عىلىمي قىزمەتكەرى مەلس باقىتبايەۆ.
سىعاناقتى زەرتتەۋ شارالارىنا وزبەكستاننىڭ سامارقاند قالاسىنداعى ورتا ازيا زەرتتەۋلەر حالىقارالىق ينستيتۋتى عالىمدارى كەلدى. ولار قازاقستاندىق ارىپتەستەرىمەن بىرگە سىعاناقتى جان-جاقتى زەرتتەۋگە نازار اۋدارىپ وتىر.
بۇدان بۇرىن جانكەنت قالاشىعى تۋريستىك نىسانعا اينالاتىنىن حابارلاعان ەدىك.
