پرەمەر-مينيستر ەلوردادا اباي اتىنداعى مەكتەپ-گيمنازيانىڭ اشىلۋىنا قاتىستى
«قۇرمەتتى ۇستازدار، اتا- انالار مەن وقۋشىلار! سىزدەردى شىن جۇرەكتەن جارقىن مەرەكە - ءبىلىم كۇنىمەن قۇتتىقتايمىن. جاڭا وقۋ جىلىندا جاڭا مەكتەپ اشىلىپ جاتىر. ءبىلىم ورداسى ۇلى تۇلعا، ويشىل، اقىن اباي قۇنانباي ۇلىنىڭ اتىندا بولادى. وزدەرىڭىز بىلەتىندەي، ءبىزدىڭ ەلىمىز كەلەسى جىلى كەڭ اۋقىمدا اباي قۇنانباي ۇلىنىڭ 175 جىلدىعىن اتاپ وتەدى»، - دەدى اسقار مامين.
ۇكىمەت باسشىسى جاس ۇرپاق وزىق بىلىمگە يە بولۋ ءۇشىن ولارعا جاڭا تەحنولوگيالار قولجەتىمدى بولاتىنىن، وقۋشىلارمەن جوعارى بىلىكتى، باسەكەگە قابىلەتتى ماماندار جۇمىس جۇرگىزەتىنىن تىلگە تيەك ەتتى.
«ءبىز ءبىلىمدى ۇلت بولۋىمىز كەرەك. بۇل رەتتە، ءمۇعالىم جۇمىسىنىڭ ماڭىزى زور. قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ تاپسىرماسىمەن «پەداگوگتار مارتەبەسى تۋرالى» زاڭ دايىندالدى. زاڭدا مۇعالىمدەردىڭ مارتەبەسىن، ايلىعىن كوتەرىپ، الەۋمەتتىك جاعدايىن جاقسارتۋعا باعىتتالعان ءبىرقاتار شارا قاراستىرىلعان»، - دەدى پرەمەر- مينيستر.
ق ر پرەمەرى مۇعالىمدەردىڭ الەۋمەتتىك جاعدايىن جاقسارتۋ جۇمىسى - ۇكىمەتتىڭ نەگىزگى مىندەتتەرىنىڭ ءبىرى ەكەنىن ەرەكشە اتاپ ءوتتى.
«قۇرمەتتى وقۋشىلار! ادام ءومىر بويى ءبىلىم ىزدەۋى ءتيىس. سيفرلاندىرۋ مەن جاساندى ينتەللەكتتى ەنگىزۋدىڭ ارقاسىندا قازىرگى تاڭدا الەمدە كوپتەگەن ماماندىق جويىلىپ كەتىپ جاتىر. جاڭالارى پايدا بولۋدا. سول سەبەپتى، سىزدەردىڭ ءبىلىم دەڭگەيلەرىڭىز باسەكەگە قابىلەتتى ءارى بۇگىنگى تالاپتارعا ساي بولۋى ءتيىس. ءبىز سىزدەرگە سەنەمىز!»، - دەدى ول.
سالتاناتتى شارا بارىسىندا يننوۆاتسيالىق ينتەللەكتۋالدى تەحنولوگيالار اكادەمياسىنىڭ باس ديرەكتورى نۇرالى قۇدايبەرگەن ۇلى ۇكىمەت باسشىسىنا «اباي تانۋ» كابينەتى مەن مەكتەپ مۋزەيىن كورسەتتى. كەلۋشىلەر سونىمەن بىرگە، «جاسىل تەحنولوگيالار» كابينەتى مەن «ۆيرتۋالدى عىلىمي لابوراتوريالاردى» تاماشالادى.
اۆتور: ايان بەكەن ۇلى
