ەلوردادا ماحامبەتتىڭ كۇيلەرى ورىندالماق
3 -قىركۇيەكتە «استانا» كونسەرت زالىندا وتەتىن كونسەرتتە ماحامبەتتىڭ بارلىق كۇيلەرى ورىندالادى. سونىڭ ىشىندە «شىلتەرلى تەرەزە»، «جورىقتا»، «قايران نارىن»، «قيلى كەزەڭ»، «جۇمىر قىلىش»، «وكىنىش» اتتى كۇيلەرى بار.
ايتا كەتۋ كەرەك، ماحامبەتتىڭ اتالعان كۇيلەرىن وركەسترگە ارناپ نوتاعا تۇسىرگەن كومپوزيتور ايتقالي جايىموۆ. سونىمەن بىرگە وسى كونسەرتتىڭ باعدارلاماسىنا ەنگەن «اق جەلەڭ» جانە «يساتايدىڭ اقتابانى-اي» كۇيلەرىن كومپوزيتور ەركىن نۇرىمبەتوۆ نوتاعا تۇسىرگەن بولاتىن. كونسەرتتە داۋىلپاز اقىننىڭ كەيبىر تۋىندىلارىن جەتكىزۋدە تانىمال دومبىراشىلار شەبەرلىكتەرىن تانىتاتىن بولسا، ەندى ءبىرقاتارىن وركەستر ورىندايدى.
سونىمەن قاتار، كونسەرتتىڭ تارتىمدىلىعىن ارتتىرا ءتۇسۋ ماقساتىندا شاعىن مۋزىكالىق كورىنىس قويىلادى. وندا كۇيشى قۇرمانعازى مەن اقىن ماحامبەتتىڭ كەزدەسۋ ءساتى بەينەلەندى. وسى كەشتە م. وتەمىس ۇلىنىڭ ولەڭىنە جازىلعان اندەر دە شىرقالادى. وركەستر ديريجەرى - نۇر-سۇلتان قالاسى مەملەكەتتىك اكادەميالىق فيلارمونياسىنىڭ قازاق حالىق اسپاپتارى وركەسترىنىڭ كوركەمدىك جەتەكشىسى جانە باس ديريجەرى ايتقالي جايىموۆ.
سونداي-اق، وسى كونسەرتتە مادەنيەت قايراتكەرى نۇرلان بەكەنوۆ پەن الىشەر قاسقىرباي ديريجەرلىك ەتەدى.
«ماحامبەتتىڭ قازاق تاريحىندا، ادەبيەتى مەن مادەنيەتىندە الاتىن ءرولى وتە زور. ول كەزىندە ادىلەتتىلىك ءۇشىن كۇرەسكەن باتىر، ءورشىل ولەڭىمەن حالىقتىڭ رۋحىن كوتەرگەن. سونداي-اق ونىڭ كۇيشىلىك ونەرى دە وتە عاجاپ. ەشكىمگە ۇقسامايدى. كۇيلەرى ەكپىندى، داۋىلدى، قايراتتى بولىپ كەلەدى. تىڭداپ قاراساڭىز، ءاربىر كۇيىنىڭ ونە بويىندا ۇلكەن كۇش بار ەكەنىن بايقايسىز. ءبىزدىڭ شىعارماشىلىق ۇجىم ونەرسۇيەر قاۋىمعا ماۋسىماشار كونسەرتىندە وسىنداي كۇي كەشىن ۇسىنىپ وتىر»، - دەدى ايتقالي جايىموۆ.
