ق ر پرەزيدەنتى ساياساتقا قاتىستى بۇرىن ايتىلماي جۇرگەن ماسەلەنى قوزعادى - بەرىك ءابدىعالي ۇلى
مۇنداي پىكىردى «كيەلى قازاقستان» عىلىمي-زەرتتەۋ ورتالىعىنىڭ باسشىسى، ۇلتتىق قوعامدىق سەنىم كەڭەسىنىڭ مۇشەسى بەرىك ءابىدعالي ۇلى ءبىلدىردى، دەپ حابارلايدى قازاقپارات ءتىلشىسى.
«پرەزيدەنتتىڭ العاشقى جولداۋى بولعاننان كەيىن ەلدىڭ اراسىندا قىزىعۋشىلىق جوعارى بولدى. ەكىنشى پرەزيدەنتىمىزدىڭ حالىققا جولداۋىن ۇلكەن ۇمىتپەن، سەنىممەن قارادىق. سەنىم اقتالدى. ءبىراز ماسەلە كوتەرىلدى. سونىڭ ىشىندە ساياساتقا قاتىستى ناقتى-ناقتى ماسەلەلەر، ساياسي رەفورمالاردى ىلگەرىلەتۋ، دامىتۋ ماسەلەسى قوزعالدى. بۇگىنگى كۇنى ساياسي مودەرنيزاتسيا جاسالماي ەكونوميكا دامىمايدى دەگەن تەزيستى ايتتى. بۇل بۇرىن ءبىز ايتا الماي جۇرگەن ماسەلە ەدى»، - دەدى بەرىك ءابدىعالي ۇلى مەملەكەت باسشىسىنىڭ جولداۋىنا وراي پىكىر بىلدىرە كەلە.
ونىڭ اتاپ وتۋىنشە، ەلىمىزدىڭ ەكونوميكاسى دامىدى. دەگەنمەن، ونىڭ مۇنان ارى قاراي دامي ءتۇسۋى ساياساتقا، الەۋمەتتىك ماسەلەلەرگە تىرەلىپ تۇر.
«بىزدە «ءتيىمدى مەملەكەت» پرينسيپى جۇمىس ىستەۋى كەرەك. ال ول ءتيىمدى جۇمىس ىستەۋى ءۇشىن سايلاۋ بولۋى قاجەت. لايىقتى، ەلدىڭ اراسىندا بەدەلدى ازاماتتار كوشەگە شەرۋگە شىقپاۋى كەرەك. ولار پارلامەنتتە، ءماسليحاتتا وتىرۋى كەرەك. سول جەردەن ماسەلەلەردى كوتەرۋى ءتيىس. سوندا ەلدىڭ بيلىككە دەگەن سەنىمى ارتادى. جولداۋدا وسى جايىندا دا ايتىلدى. بۇل ۇلكەن ساياسي قادام. ەندى وسىنى ارى قاراي ىلگەرىلەتىپ، قوعام بولىپ قولداۋ كورسەتۋ - ءبىزدىڭ الدىمىزدا تۇرعان پارىزىمىز، مىندەتىمىز»، - دەدى ول.
ەستەرىڭىزگە سالا كەتەيىك، بۇگىن مەملەكەت باسشىسى قاسىم-جومارت توقايەۆ قوعامدى مازالاعان نەگىزگى ماسەلەلەر كوشەلەردە ەمەس، ازاماتتىق ديالوگ اياسىندا پارلامەنتتە شەشىلۋى تيىستىگىن ايتقان ەدى.
اۆتور: مارلان جيەمباي
