شەرۋگە رەسمي رۇقسات بەرىلۋى ماڭىزدى ماسەلە - مۇرات ابەنوۆ
«قازىرگى ۋاقىتتا ازاماتتاردىڭ اراسىندا ساياسي بەلسەندىلىك وتە جوعارى. مۇنى وتكەن سايلاۋمەن دە بايلانىستىرامىز. دەگەنمەن، سوڭعى 3-4 جىلدا قوعام قاتتى وزگەردى، قۇقىقتىق ساۋاتتىلىعى جوعارىلادى. بۇگىندە «قوعامدا ءبىر نارسە ايتساڭ، ونى بارلىعى بىردەي قابىلدايدى» دەپ ايتۋعا بولمايدى. ياعني، قوعام وزگەرگەننەن كەيىن ءار ايتىلعان ماسەلەنى ورتاعا سالىپ تالقىلاپ وتىرعان ءجون. وسى تۇرعىدا بۇگىنگى جولداۋدان وزىمە كەرەك دۇنيەنىڭ باسىم بولىگىن ەستىدىم»، - دەدى قوعام قايراتكەرى قازاقستان پرەزيدەنتى قاسىم-جومارت توقايەۆتىڭ قازاقستان حالقىنا جولداۋىنا وراي پىكىر بىلدىرە كەلە.
ونىڭ اتاپ وتۋىنشە، بۇگىنگى جولداۋدا قىسقا جانە ۇزاق مەرزىمدى ماسەلەلەر قامتىلعان. قىسقا مەرزىمدى ماسەلەلەرگە اۆياتسيا، تەمىر جول بيلەتتەرىنىڭ تاپشىلىعى سىندى پروبلەمالاردى جاتقىزساق، ۇزاق مەرزىمدى ماسەلەدە ساياسي جۇيەنى جاڭعىرتۋ جايىن ايتۋعا بولادى.
«سوڭعى جىلدارى ازاماتتار الەۋمەتتىك، ەكونوميكالىق قانا ەمەس ساياسي دا تالاپ قويىپ وتىر. ايتالىق، الداعى ۋاقىتتا ەكونوميكانى دامىتۋ ءۇشىن مىندەتتى تۇردە ساياسي وزگەرىستەر جاساۋىمىز كەرەك دەگەن پىكىر بار. بۇرىن ءبىز كەرىسىنشە، الدىمەن ەكونوميكا، سودان كەيىن ساياسات دەپ ايتاتىنبىز. ال بۇگىن وسى ماسەلە قوزعالىپ، شەرۋگە شىعۋعا رۇقسات بەرىلەتىندىگى رەسمي ايتىلدى. مەنىڭشە، بۇل ماڭىزدى ماسەلە»، - دەدى مۇرات ابەنوۆ.
ارىپتەسىن قولداعان ساياساتتانۋشى ەرلان سايروۆ شەت مەملەكەتتەردە ورىن الىپ جاتقان شەرۋلەردەن ەشكىمنىڭ دە ۇتىلىپ جاتپاعانىن ايتتى.
«مەنىڭشە، بۇل جۇيە جاقىن ارادا قازاقستانعا دا كىرەدى. بۇل دۇرىس نارسە. سونىمەن قاتار الەۋمەتتىك ماسەلەلەر دە بار. ولار بولاشاقتا شەشىلەدى دەگەن ويدامىز. وسى ورايدا اتاپ وتەرلىك تاعى ءبىر ماسەلە بار. ءبىزدىڭ بولاشاعىمىز - جاستار. جاستاردىڭ الەۋمەتتىك ليفتىلەرىن جاساۋ، ولاردىڭ بولاشاققا دەگەن كوزقاراسىن وزگەرتۋ سىندى ماسەلەلەر قاراستىرىلدى. بۇل دا وتە ورىندى ماسەلە»، - دەدى ول.
ايتا كەتەيىك، مەملەكەت باسشىسى قاسىم-جومارت توقايەۆ بۇگىنگى جولداۋىندا ەلدە ميتينگكە شىعۋ ءۇشىن ارنايى ورىن بەرىلۋى مۇمكىندىگىن ايتتى.
