ەلدەگى ماسەلەلەر كوشەدە ەمەس، پارلامەنتتە شەشىلۋى كەرەك - قاسىم-جومارت توقايەۆ
«بىرىنشىدەن، پارتيالى قۇرىلىم پروتسەسىن جالعاستىرۋ كەرەك. «نۇر وتان» پارتياسى ءبىزدىڭ كوشباسشىمىز جانە ونىڭ ءتوراعاسى نۇرسۇلتان نازاربايەۆتىڭ ارقاسىندا كۇردەلى ءارى جاۋاپتى ميسسيانى ورىنداپ كەلەدى. ءبىز قوعام ءۇشىن پايدالى ىستەردى تىندىرىپ جۇرگەن باسقا دا ساياسي پارتيالار جانە قوزعالىستارمەن سەرىكتەسۋىمىز كەرەك. ءبىزدىڭ قوعامدى مازالاعان نەگىزگى ماسەلەلەر كوشەلەردە ەمەس، ازاماتتىق ديالوگ اياسىندا پارلامەنتتە شەشىلۋى ءتيىس. دەپۋتاتتار ءوزىنىڭ زاڭدى قۇقىعىن پايدالانىپ، ۇكىمەتكە وزەكتى ماسەلەلەر تۋرالى ساۋال جولداپ، ودان ناقتى شارالاردى قابىلداۋدى تالاپ ەتۋى كەرەك»، - دەدى پرەزيدەنت قازاقستان حالقىنا جولداۋىندا.
سونىمەن قاتار مەملەكەت باسشىسى بەيبىت شەرۋلەر تۋرالى ايتتى.
«ميتينگتەر تۋرالى زاڭنامانى جەتىلدىرۋ قاجەت. كونستيتۋتسياعا سايكەس، ازاماتتارىمىز ءوز ويىن ەركىن ءبىلدىرۋ قۇقىعىنا يە. ەگەر ونداي اكسيالار زاڭ مەن ازاماتتاردىڭ تىنىشتىعىن بۇزبايتىن بولسا، قولداۋ ءبىلدىرىپ، زاڭدا كورسەتىلگەن ءتارتىپ بويىنشا ميتينگ وتكىزۋگە رۇقسات بەرىلۋ كەرەك. ول ءۇشىن ارنايى ورىن ءبولۋ قاجەت»، - دەدى مەملكەت باسشىسى قازاقستان حالقىنا جولداۋىندا.
