پرەزيدەنت: قوعامدىق-ساياسي جاڭعىرۋسىز تابىستى ساياسي رەفورما جۇرگىزۋ مۇمكىن ەمەس

نۇر-سۇلتان. قازاقپارات -  مەملەكەت باسشىسى قاسىم-جومارت توقايەۆ ەلدەگى ساياسي رەفورمالار ويلى تۇردە جۇرگىزىلەتىنىن ءمالىم ەتتى.

بۇل تۋرالى پرەزيدەنت ق ر پارلامەنتى پالاتالارىنىڭ بىرلەسكەن وتىرىسىندا جاريالاعان جولداۋىندا اتاپ ءوتتى، دەپ حابارلايدى قازاقپارات ءتىلشىسى.

«ورتاق تاپسىرلامالاردى ورىنداۋدا ءوزىمنىڭ كوزقاراستارىمدى ايتا كەتسەم دەيمىن. زاماناۋي ءتيىمدى مەملەكەت! مەن ۋادە ەتكەن ساياسي ترانسفورماتسيا كەزەڭ-كەزەڭىمەن ىسكە اسىرىلىپ، مەملەكەت پەن حالىقتىڭ بارلىق مۇددەلەرى ەسكەرىلەدى. الەمدىك تاجىريبەنىڭ ءوزى كورسەتىپ وتىرعانداي، جۇيەسىز ساياسي ليبەراليزاتسيا ىشكى ساياسي جاعدايدا دەستابيليزاتسياعا، ءتىپتى مەملەكەتتى جوعالتىپ الۋعا دەيىن اپارىپ تىنادى. سول سەبەپتى ءبىز ساياسي رەفورمالاردى العا قاراي جۇگىرمەي، نىق ءارى ويلى تۇردە جۇرگىزەمىز. ءبىزدىڭ ىرگەلى قاعيدات - ەلدىڭ قوعامدىق-ساياسي جاڭعىرۋىنسىز تابىستى ساياسي رەفورما جۇرگىزۋ مۇمكىن ەمەس»، - دەدى قاسىم-جومارت توقايەۆ.

قاسىم-جومارت توقايەۆتىڭ ايتۋىنشا، مىقتى پرەزيدەنت، ىقپالدى پارلامەنت، ەسەپ بەرەتىن ۇكىمەت -  وسى ماقساتقا ۇمتىلۋىمىز كەرەك.

«بۇل ساياسي جۇيەنىڭ فورمۋلاسى - مەملەكەت تۇراقتىلىعىنىڭ نەگىزى. ءبىزدىڭ ورتاق مىندەتىمىز - ازاماتتاردىڭ بارلىق كونسترۋكتيۆتى ساۋالدارىن جەردە قالدىرمايتىن تىڭداۋشى مەملەكەت كونتسەپتسياسىن ىسكە اسىرۋ. تەك تۇراقتى ديالوگتىڭ ارقاسىندا ۇيلەسىمدى مەملەكەت قۇرۋعا بولادى»، - دەدى پرەزيدەنت.

ەسكە سالا كەتسەك، ەلوردادا ق ر پارلامەنتى پالاتالارىنىڭ بىرلەسكەن وتىرىسى باستالدى. جيىن بارىسىندا قازاقستان پرەزيدەنتى قاسىم-جومارت توقايەۆ قازاقستان حالقىنا العاشقى جولداۋىن جاريالاۋدا.