13:56, 02 - قىركۇيەك 2019 | GMT +6
قازاقستاندىق بىتىمگەرلەر ليۆاندا تولىق جاۋىنگەرلىك ازىرلىككە كەلتىرىلدى
نۇر-سۇلتان. قازاقپارات - قازاقستاندىق بىتىمگەرلەر ليۆاندا تولىق جاۋىنگەرلىك ازىرلىككە كەلتىرىلدى، دەپ حابارلايدى قازاقپارات ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
«بيىل 1- قىركۇيەكتە يزرايل اسكەرى ليۆان اۋماعىنان وق جاۋدىرۋىنا قارسى جاۋاپ رەتىندە مارۋ ار-راس، ايتارۋن، يارۋن (ليۆان) ەلدى مەكەندەرىنىڭ شەت جاعىنا اۋەدەن جانە ارتيللەريالىق شابۋىل جاسادى. ب ۇ ۇ جاساعى مىندەتتەمەلەرگە سايكەس تاپسىرمالاردى ورىنداۋ ءۇشىن تولىق جاۋىنگەرلىك ازىرلىكتە تۇردى. قازىرگى ۋاقىتتا ەشقانداي قاۋىپ جوق. ق ر قارۋلى كۇشتەرى اسكەري قىزمەتشىلەرى تاراپىنان ەشكىم زارداپ شەكپەگەن. جاعداي ءبىرقالىپتى. بروندالعان كولىكتەرمەن پاترۋلدەۋ جۇرگىزىلىپ جاتىر»، دەلىنگەن حابارلامادا.
ەسكە سالايىق، ليۆانداعى ب ۇ ۇ قارۋلى كۇشتەرى ميسسياسى قۇرامىندا قازاقستان قارۋلى كۇشتەرى ەكىنشى قۇراما بىتىمگەرلىك روتاسىنىڭ اسكەري قىزمەتشىلەرى بار.
