قازاق بوكسشىلارى ماسكەۋدە قارسىلاستارىن نوكاۋتقا جىبەردى

نۇر-سۇلتان. قازاقپارات - قازاقستاندىق كاسىپقوي بوكسشىلار اسان رايىمبەك پەن عالىم شاعاتاي ماسكەۋدەگى بوكس كەشىندە رەسەيلىك قارسىلاستارىن نوكاۋتقا جىبەردى، دەپ حابارلايدى قازاقپارات ءتىلشىسى.

«قازاقستان كاسىپقوي بوكسى» ۆكونتاكتە پاراقشاسىندا ءمالىم ەتكەندەي، @Tukeshov_Boxing كومپانياسىنىڭ اتىنان شىققان اسان رايىمبەك جەرگىلىكتى بوكسشى دميتري راحمانوۆقا قارسى ايقاس وتكىزگەن.

ءبىرىنشى راۋندتىڭ ءۇشىنشى مينۋتىندا-اق قازاقستاندىق قارسىلاسىن نوگداۋنعا جىبەرگەن. راۋند سوڭىندا رەسەيلىك جەكپە-جەكتى جالعاستىرۋدان باس تارتتى.

وسىلايشا، اسان رايىمبەك كاسىپقوي بوكس كارەراسىندا ەكىنشى مارتە مەرزىمىنەن بۇرىن جەڭىسكە جەتىپ وتىر. ال عالىم شاعاتاي ماسكەۋدە بۇل جولى كاسىپقوي رينگتە ءتورتىنشى كەزدەسۋىن وتكىزدى.

قازاق بوكسشىسى رەسەيلىك الەكساندر سالتىكوۆتى ۇزاققا اپارعان جوق. ەكىنشى راۋندتا نوكاۋتقا جىبەردى. وسىلايشا، عالىم ءبىرىنشى جارتىلاي ورتا سالماقتا ProBox نۇسقاسى بويىنشا ت م د چەمپيونى تيتۋلىن جەڭىپ الدى.

ايتا كەتەيىك، @Tukeshov_Boxing پروموۋتەرلىك كومپانياسى عالىم شاعاتايعا ۇلكەن ءۇمىت ارتىپ وتىر. قازىردىڭ وزىندە كومپانيا بوكسشىنى ايماقتىق WBC بەلدىگى ءۇشىن ايقاسقا شىعارۋ ءۇشىن كەلىسسوز جۇرگىزۋدە.

اۆتور: ايان بەكەن ۇلى