شەكارادان التى قاپ پىشاق الىپ وتپەك بولعان شەتەلدىك ۇستالدى

تاراز. قازاقپارات -  جامبىلدىق شەكاراشىلار قازاقستانعا قاپ-قاپ كەزدىك الىپ وتپەكشى بولعان شەتەل ازاماتىن قۇرىقتادى، - دەپ حابارلايدى قازاقپارات.

اتالعان فاكت «قارۋ» جەدەل-الدىن الۋ ءىس-شاراسىن وتكىزۋ كەزىندە انىقتالعان. بۇل تۋرالى وبلىستىق پوليتسيا دەپارتامەنتىنىڭ باسپا ءسوز قىزمەتى مالىمدەدى.

«جامبىل اۋدانىنىڭ پوليتسيا ءبولىمى جانە ق ر ۇ ق ك شەكارا قىزمەتىنىڭ قىزمەتكەرلەرى قىرعىز رەسپۋبليكاسىنان قازاقستان رەسپۋبليكاسىنىڭ اۋماعىنا كىرەر كەزدە «ايشا ءبيبى» وتكىزۋ بەكەتىندە رەسەي فەدەراتسياسىنىڭ 52 جاستاعى ازاماتىنىڭ باسقارۋىنداعى «داف» ماركالى اۆتوماشيناسىن توقتاتىپ، قاراپ شىقتى. تەكسەرۋ كەزىندە كولىك قۇرالىنىڭ جۇك بولىگىنەن قولدان جاسالعان پىشاعى بار التى قاپ تابىلدى»، - دەلىنگەن ۆەدومستۆو حابارلاماسىندا. قازىرگى تاڭدا بۇل پىشاقتار كىمگە تيەسىلى، قانداي ماقساتتا شەكارادان وتكىزىلمەك بولعاندىعىن انىقتاۋ ماقساتىندا سوت-مەديتسينالىق ساراپتاما تاعايىندالعان. قازاقستان رەسپۋبليكاسى قىلمىستىق كودەكسىنىڭ 287 بابى، 1- تارماعىنا سايكەس، سوتقا دەيىنگى تەرگەۋ امالدارى جۇرگىزىلۋدە.