نازاربايەۆ يادرولىق دەرجاۆالارعا پوليگونداردىڭ ينفراقۇرىلىمدارىن جويۋدى ۇسىندى
«يادرولىق كلۋب مۇشەلەرى جاپپاي قىرىپ- جويۋ قارۋلارى سالاسىنداعى وزدەرىنىڭ ساياساتتارىن تۇزەتۋ ەسەبىنەن مىندەتتەمەلەر مەن شەكتەۋلەر قابىلداۋى ءتيىس. بۇل رەتتە، ولاردىڭ يادرولىق كەشەندەردى جاڭعىرتۋعا قولداۋ كورسەتۋدىڭ ءداستۇرلى تاجىريبەسىنەن تەجەلۋى ماڭىزدى. اۋماقتارىندا پوليگوندار ورنالاسقان مەملەكەتتەرگە پوليگونداردىڭ ينفراقۇرىلىمدارىن جويۋدى ۇسىنامىن. قازاقستاننىڭ تاجىريبەسى بار. ول رەسەيدە دە، ا ق ش- تا دا بار. ءبىز ولارمەن بولىسۋگە دايىنبىز»، - دەدى ەلباسى «يادرولىق قارۋسىز الەم جانە جاھاندىق قاۋىپسىزدىك ءۇشىن نازاربايەۆ سىيلىعىن» تابىستاۋ راسىمىندە.
ق ر تۇڭعىش پرەزيدەنتىنىڭ اتاپ وتۋىنشە، سوڭعى 20 جىلدىڭ ىشىندە يادرولىق سىناقتارعا جاپپاي تىيىم سالۋ شارتىن امبەباپتاندىرۋ ىسىندە جانە مونيتورينگتىڭ حالىقارالىق جۇيەسى كومەگىمەن ونىڭ ساقتالۋىن باقىلاۋدا ايتارلىقتاي پروگرەسكە قول جەتكىزىلدى. دەگەنمەن، اتالعان شارت كۇشىنە ەنۋى ءۇشىن الەمدىك قوعامداستىق بارىنشا تاباندىلىق تانىتىپ، ونى ءالى كۇنگە دەيىن راتيفيكاتسيالاماعان ەلدەرگە قابىلداتۋ قاجەت.
يادرولىق سىناقتارعا جاپپاي تىيىم سالۋ شارتى تەتىكتەرى رەجيمىن بارىنشا نىعايتۋدى تۇبەگەيلى امبەباپتاندىرۋعا قول جەتكىزۋ ماڭىزدى. الەمگە يادرولىق قارۋدىڭ كوبەيىپ، تارالۋىنا قارسى قاتاڭ شارالاردىڭ جۇمىس ىستەيتىن شىنايى تەتىگى قاجەت. دۇنيەجۇزىلىك اۋقىمداعى مۇنداي شارتتى ب ۇ ۇ قابىلداعان. مۇنان كەيىن دە ءۇندىستان مەن پاكىستان يادرولىق مەملەكەتكە اينالدى. سوندىقتان ءبىز قابىلداعان بۇل شارتتىڭ قاتاڭ شارالار تەتىكتەرى ب ۇ ۇ قاۋىپسىزدىك كەڭەسىنىڭ ءتيىستى قارارىمەن كۇشەيتىلۋى ءتيىس»، - دەدى نۇرسۇلتان نازاربايەۆ.
اۆتور: مارلان جيەمباي
