ەلباسى الەمدىك دەرجاۆالاردىڭ باسشىلارىن قازاقستانعا شاقىردى
«قازىرگى بارلىق سىن- تەگەۋرىندەر مەن سىن- قاتەرگە بەتپە- بەت كەلىپ وتىرعان جاھاندىق قوعامداستىق ءوزى بويىنان دانالىق تاۋىپ، ءبىزدىڭ عالامشارىمىزدىڭ بولاشاعى ءۇشىن ديالوگقا قاراي باتىل قادام جاساۋى ءتيىس. بۇل ديالوگ ەگەر دە بارلىق يادرولىق دەرجاۆانىڭ باسشىلارى كەلىسسوزدەر ۇستەلىنە وتىرار بولسا، ناتيجەلى بولماق»، - دەدى ەلباسى بۇگىن «يادرولىق قارۋسىز الەم جانە جاھاندىق قاۋىپسىزدىك ءۇشىن نازاربايەۆ سىيلىعىن» تابىستاۋ راسىمىندە.
وسى رەتتە، قازاقستان تۇڭعىش پرەزيدەنتى ا ق ش، رەسەي جانە قىتايدىڭ جانە وزگە دە يادرولىق دەرجاۆالاردىڭ باسشىلارىن قازاق جەرىندە كەزدەسىپ، ۋاعدالاستىققا قول جەتكىزۋگە رەسمي ۇسىنىس جاساعانىن ايتتى.
«مۇنداي جايت تاريحتا بىرنەشە رەت بولىپ، ءىرى مەملەكەتتەردىڭ باسشىلارى بارلىق ۋاقىتتا دا ادامزاتتىڭ ەرتەڭگى كۇنى ءۇشىن وزدەرىنە جاۋاپكەرشىلىك الدى. ءبىرىنشى دۇنيەجۇزىلىك سوعىستان كەيىن دە، ەكىنشى دۇنيەجۇزىلىك سوعىستان كەيىن دە سولاي بولدى. ناتيجەسىندە بىرىككەن ۇلتتار ۇيىمى قۇرىلدى. ويتكەنى، بارلىق جانجالدار كەلىسسوزدەرمەن اياقتالادى»، - دەدى نۇرسۇلتان نازاربايەۆ.
يادرولىق قارۋدان ءوز ەركىمەن باس تارتقان مەملەكەتكە يادرولىق دەرجاۆالار قاۋىپسىزدىك كەپىلىن بەرۋى ءتيىس.
«يادرولىق قارۋ نەگىزىندە ستراتەگيالىق تۇراقتىلىقتىڭ كونەرگەن تۇجىرىمداماسىن قايتا قاراۋ قاجەت. يادرولىق قارۋلانۋدى باقىلاۋدىڭ جاڭا جۇيەسىن قالىپتاستىرۋ دا كەرەك. قورىتىندىسىندا يادرولىق قارۋلانۋدى قىسقارتۋ بويىنشا جالپى قامتىمدى شارتتى ازىرلەۋ بويىنشا كەلىسسوزدەرگە شىعۋ ماڭىزدى» ، - دەدى ەلباسى.
نۇرسۇلتان نازاربايەۆ يادرولىق دەرجاۆالار تاراپىنان قاۋىپسىزدىكتىڭ زاڭدى تۇرعىدا مىندەتتى كەپىلىنىڭ ءتيىمدى جۇيەسىن ەنگىزۋ ماسەلەسى دە بارىنشا وزەكتى ەكەندىگىن اتاپ ءوتتى.
«قاۋىپسىزدىك كەپىلى ءوز ەركىمەن يادرولىق قارۋدان باس تارتقان، سونىمەن قاتار يادروسىز مارتەبەسى بار مەملەكەتتەرگە بەرىلۋى ءتيىس»، - دەدى ول.
اۆتور: مارلان جيەمباي
